Suiqasdda ayblangan Allamjonovning xodimlari jazodan norozi

north_east

Allamjonovga suiqasd ishi sudga chiqarildi

O‘zbekiston Respublikasi Prezidenti Administratsiyasi Axborot siyosati departamentining sobiq rahbari Komil Allamjonov o‘ziga bo‘lgan suiqasd doirasida 15 sutka ma’muriy qamoq jazosiga hukm qilingan 7 nafar xodimini himoya qilmoqchi. Bu haqda 2024 yil 26 oktyabrda ma’muriy javobgarlikka tortilgan yetti nafar fuqaroning manfaatlarini himoya qilayotgan advokat Davronbek Saidov QALAMPIR.UZ’ga ma’lum qildi.

“Ular 26 oktyabrga o‘tar kechasi Komil Ismoilovich Allamjonovga bo‘lgan suiqasddan keyin jazolangan. Tergov guruhi a’zolari tomonidan qo‘riqchi, oshpaz va qorovul hisoblangan ushbu yetti nafar shaxs sodir etilgan jinoyatga aloqadorligini aniqlash maqsadida olib ketilgan. Kun davomida ular o‘z tushuntirishlarini berishgan. Biroq noma’lum sabablarga ko‘ra, 26 oktyabr kuni kechqurun barcha tergovlardan o‘tib, uyda bo‘lganlarida, ular yana Qibray tumani IIBga chaqirilgan. U yerda ulardan mayda bezorilik to‘g‘risidagi hujjatga imzo chekishni so‘rashgan. Ushbu hujjatlarni imzolashdan bosh tortgach, ular Qibray tuman sudiga olib borilgan”, deya ish yuzasidan izoh berdi advokat.

Uning aytishicha, ularga sud tomonidan advokat taqdim etilmagan va sudya shunchaki hukmni e’lon qilgan. Shu sababli Allamjonovning o‘zi xodimlarini himoya qilish maqsadida advokatga murojaat qilgan.

“Sudya ularni 15 sutkaga ma’muriy qamoqqa olishga hukm qildi. Ma’lum qilinishicha, agar ular rozi bo‘lmasa, hibsga olish yuzasidan yuqori turuvchi organga shikoyat qilishlari mumkin bo‘lgan. 2024 yil 3 noyabrga qadar advokatlarga ular bilan uchrashishga ruxsat berilmagan, sud qarorlari ustidan shikoyat qilish imkoni ham yo‘q edi. Komil Ismoilovich Alamjonov bu fuqarolarni himoya qilish uchun menga murojaat qildi”, dedi u.

Saidov ma’muriy huquqbuzarlik to‘g‘risidagi ish bo‘yicha chiqarilgan qarorni ko‘rib chiqqanini va o‘sha kuni hech qanday ma’muriy huquqbuzarlik sodir bo‘lmaganini aytdi.

“Ya’ni, yuqorida qayd etilgan fuqarolar Qibray tumanida joylashgan “Arvin” kafesi ro‘parasida bo‘lmagan, ular spirtli ichimliklar iste’mol qilib, mayda bezorilik sodir etganliklari aytilgan. Tuman ichki ishlar xodimi ma’muriy huquqbuzarlik to‘g‘risida bayonnoma tuzgan va shuning uchun ular ma’muriy qamoqqa olingan.

Apellyatsiya shikoyatidan keyin apellyatsiya sudi ularni sud zaliga taklif qilishdan bosh tortdi.  Ayni paytda Ma’muriy javobgarlik to‘g‘risidagi kodeks sud majlisida shaxsan ishtirok etishni nazarda tutadi va bu qoidadan istisnolar yo‘q. Sud ma’muriy qamoqqa olingan shaxslarning ishtirok etishini ta’minlashi shart, lekin ular ham apellyatsiya sudiga taklif etilmagan. Natijada ular oxirigacha o‘n besh sutkalik ma’muriy qamoqqa olindi”, deya o‘z shikoyatining mazmunini tushuntirgan advokat.

Uning aytishicha, sudga tashqi tomondan bosim bo‘lgan bo‘lishi mumkin.

“Nega advokatlar taqdim etilmaganiga kelsak, chetdan ta’sir o‘tkazgan degan taxminlar bor. Tashqi ta’sir bo‘lishi mumkin edi, chunki ma’muriy huquqbuzarlik to‘g‘risidagi bayonnomani tuzgan mansabdor shaxslar o‘zlari bunday qaror qabul qila olmasdi. Biz 23 yanvar kuni sudga huquqlar buzilganligi to‘g‘risida xususiy ajrim chiqarilishini, so‘ngra ushbu qonunbuzarliklarga huquqiy baho berilishini so‘rab ariza bilan murojaat qilmoqchimiz. Bosh prokuraturaga ehtimoliy tazyiqlar yuzasidan murojaat yuborildi. Yozma shikoyatni ko‘rib chiqqanimizdan so‘ng biz batafsilroq tushuntirishlar bera olamiz”, dedi Davronbek Saidov.

Eslatib o‘tamiz, bugun, 13 yanvar kuni soat 9:30 da Komil Allamjonovga suiqasddan so‘ng jamoat tartibini buzganlik aybloviga ko‘ra 15 sutkaga qamoqqa olingan yetti nafar fuqaroning ishi bo‘yicha O‘zbekiston Respublikasi Oliy sudida taftish tartibida ochiq sud majlisi o‘tkazishi xabar qilingandi.  Biroq sud majlisi 23 yanvar kuniga qoldirildi.