Germaniyada Alisher Usmonov yashagan villa sotuvga qo‘yildi

Germaniyaning Bavariya federal shtatida rossiyalik milliarder Alisher Usmonov uzoq vaqt yashagan villa sotuvga qo‘yildi. Bu haqda “Münchner Merkur” gazetasi xabar berdi.

Nashrga ko‘ra, villa kompaniyaning ofshor qarzlarini to‘lash uchun sotilmoqda. Villaning dastlabki narxi 25 million 599 ming dollardan ortiqni tashkil qilgan. Bu Germaniyadagi ko‘chmas mulk sotuvi bo‘yicha ma’lumotlarni to‘playdigan “Immowelt” agregator veb-sayti tarixidagi eng qimmat narx bo‘ldi. Internet portali 1996 yildan beri faoliyat yuritib kelmoqda.

Villa sud qarori asosida mulkni sotishni amalga oshirayotgan to‘lovga layoqatsiz boshqaruvchi Ulrich Cramer tomonidan sotuvga qo‘yilgan. Bavariyaning Volfratsxauzen shahri sudi unga Men orolida ro‘yxatdan o‘tgan Tegernsee (IOM) Limited ofshor kompaniyasi kreditorlarining da’volarini qondirishni buyurgan. Aynan u villani 2011 yilda 7,3 million dollarga sotib olgan edi.

Kompaniya to‘lovga layoqatsiz bo‘lgan, chunki “bu qarzdor kompaniyaning aktivlari asosan ko‘chmas mulkdan iborat bo‘lib, tabiiyki, to‘lanmagan qarzlarni qoplash uchun mos emas”. Shunday qilib, endi villani bankrot kompaniyaning qarzlarini to‘lash uchun sotish kerak.

Uch qavatli villa Rottax-Egern qishlog‘ida, Tegernze Alp ko‘li qirg‘og‘ida, Fishershtrasse 12 da joylashgan va 4700 kvadrat metr maydonni egallagan. 2011 yildan keyin Usmonov uni Tegernsee (IOM) Limited kompaniyasidan haftasiga 78 ming 785 dollarga ijaraga olgan.

Usmonov qanday qilib Tegernze sohiliga borib qoldi?

Usmonov Bavariyaga myunxenlik shifokorga ko‘zini davolatish uchun borgan.

“Rottax-Egerndagi bu betakror maskanning jozibasi shundaki, men xuddi o‘zimni O‘zbekistondagidek his qildim”, deya oligarxning so‘zlaridan iqtibos keltiradi Germaniyaning “T-online” nashri.

Keyinchalik, Usmonov o‘sha qishloqda, boshqa sohil kompaniyalari orqali yana ikkita uy sotib olgan. Ulardan biri faqat xodimlar uchun: tansoqchilar, xizmatchilar, haydovchilar. Gazetaning yozishicha, 2015 yildan beri Tegernsee (IOM) Limited kompaniyasi Usmonovning Rottax-Egerndagi asosiy villasida xizmat qilgan 12 kishini ish bilan ta’minlagan.

Hozir, gazeta yozganidek, Myunxen prokuraturasi Usmonovga nisbatan soliq to‘lashdan bo‘yin tovlaganlikda gumon qilib, tergovni davom ettirmoqda. Tergovchilar oligarxning Rottax-Egerndagi mavjudligi uning yashash joyida eng kech 2014 yildan beri bo‘lish mezonlariga javob berganiga ishonchi komil. Bu milliarderning u yerda soliq to‘lashi kerakligini anglatadi. Ma’lum bo‘lishicha, u kuz va qish oylarida Tegernze qirg‘og‘ida bir necha oy yashagan va bir vaqtlar u yerda va Myunxenda ro‘yxatga olingan.

Eslatib o‘tamiz, avvalroq Gamburg sudi Germaniyaning ARD telekanali tomonidan milliarder Alisher Usmonov haqida tarqatilgan xabarni haqiqatdan yiroq deb topgandi.