“Al-Hilol” Jahon chempionati qahramonlaridan birini o‘z safiga qo‘shib olmoqchi 

Saudiya Arabistonining “Al-Hilol” klubi “Sevilya” darvozaboni Yassin Bununi sotib olishga yaqin turibdi. Bu haqda taniqli insayder Fabritsio Romano xabar berdi. 

Unga ko‘ra, “Bavariya” “Sevilya” bilan Yassin Bunu transferi bo‘yicha muzokaralarni to‘xtatgan. Saudiya Arabistonining “Al-Hilol” klubi esa bu imkoniyatni o‘zi tomonga ijobiy hal qilish uchun allaqachon harakatni boshlab yuborgan. 

“Saudiya klubi “Sevilya” darvozaboni Yassin Bununi sotib olishga yaqin turibdi. Tomonlar 18-19 million yevroga baholangan bitimning so‘nggi tafsilotlarini muhokama qilmoqda”, deydi Romano.

Insayderning aniqlik kiritishicha, marokashlik posbon “Al-Hilol” “Bavariya”dan ko‘ra ko‘proq narsani taklif qilayotganini anglab, muzokaralarni to‘xtatgan bo‘lishi mumkin. 

Ma’lumot uchun, Yassin Bunu 2019 yildan beri “Sevilya” darvozasini himoya qiladi. U 2022 yilda Marokash terma jamoasi bilan Qatarda bo‘lib o‘tgan futbol bo‘yicha kattalar o‘rtasidagi Jahon chempionatida 4-o‘rinni qo‘lga kiritgan. Chempionatning bronza medali uchun kechgan bahsda Marokash Xorvatiyaga 2:1 hisobida imkoniyatni boy berib qo‘ygan. 

Eslatib o‘tamiz, avvalroq Saudiya Arabistonining “Al-Hilol” klubi braziliyalik futbolchi Neymarni o‘z safiga qo‘shib olgani haqida xabar berilgan edi. Shuningdek, mazkur transfer shartlari ichida futbolchiga mamlakat hududida nikohsiz yashashga ham ruxsat berilgani aytilgandi.