AQSHning yangi sanksiyalari Eron neftiga qaratildi 

Amerika Qo‘shma Shtatlari kecha, 2 mart kuni Eron neft va neft-kimyo mahsulotlarini olib o‘tgan yoki sotgan firmalarga, shu jumladan, Xitoyda joylashgan ikkita kompaniyaga nisbatan sanksiyalar joriy qildi. Bu haqda “Reuters” xabar berdi.

Qayd etilishicha, sanksiyalar Vashingtonning Eron neft kontrabandasini cheklashga qaratilgan harakatlarining bir qismi bo‘lib, Tehronning 2015 yilgi yadroviy kelishuvini jonlantirishga qaratilgan sa’y-harakatlari fonida uning G‘arb bilan munosabatlari keskinlashgan paytda joriy etilgan.

AQSH Davlat kotibi Entoni Blinken ham o‘z bayonotida sanksiyalar Eronning neft va neft-kimyo savdosiga yordam bergan 11 firma va unga aloqador 20 ta yuk tashish kemasini o‘z ichiga olganini tasdiqlagan.

“Bu belgilanishlar Eronga qarshi sanksiyalarimizni qo‘llash bo‘yicha davom etayotgan sa’y-harakatlarimizni ta’kidlaydi”, deydi Blinken.

O‘z navbatida, Eron tarafi, xususan, uning BMTdagi missiyasi Bayden ma’muriyatini AQSH sobiq hukumatining muvaffaqiyatsiz maksimal bosim siyosatini takrorlashda ayblagan.

“Eron bu sanksiyalarga ko‘nikib qolgan, ammo agar AQSH bir kun kelib Eron yadroviy kelishuviga qaytishni istasa, bu AQSH hukumati uchun ularning barchasini bekor qilishni qiyinlashtiradi”, deydi Eronning BMTdagi missiyasi.

AQSH G‘aznachilik departamentining Xorijiy aktivlarni nazorat qilish boshqarmasi ma’lumotlariga ko‘ra, sanksiyalangan firmalardan ikkitasi Xitoyda, qolganlari Vetnam va Birlashgan Arab Amirliklarida joylashgan. Sanksiyalar firmalarning AQSHdagi aktivlarini muzlatib qo‘yadi va odatda amerikaliklarga ular bilan ishlashni taqiqlaydi.