АҚШнинг янги санкциялари Эрон нефтига қаратилди 

Америка Қўшма Штатлари кеча, 2 март куни Эрон нефть ва нефть-кимё маҳсулотларини олиб ўтган ёки сотган фирмаларга, шу жумладан, Хитойда жойлашган иккита компанияга нисбатан санкциялар жорий қилди. Бу ҳақда “Reuters” хабар берди.

Қайд этилишича, санкциялар Вашингтоннинг Эрон нефть контрабандасини чеклашга қаратилган ҳаракатларининг бир қисми бўлиб, Теҳроннинг 2015 йилги ядровий келишувини жонлантиришга қаратилган саъй-ҳаракатлари фонида унинг Ғарб билан муносабатлари кескинлашган пайтда жорий этилган.

АҚШ Давлат котиби Энтони Блинкен ҳам ўз баёнотида санкциялар Эроннинг нефть ва нефть-кимё савдосига ёрдам берган 11 фирма ва унга алоқадор 20 та юк ташиш кемасини ўз ичига олганини тасдиқлаган.

“Бу белгиланишлар Эронга қарши санкцияларимизни қўллаш бўйича давом этаётган саъй-ҳаракатларимизни таъкидлайди”, дейди Блинкен.

Ўз навбатида, Эрон тарафи, хусусан, унинг БМТдаги миссияси Байден маъмуриятини АҚШ собиқ ҳукуматининг муваффақиятсиз максимал босим сиёсатини такрорлашда айблаган.

“Эрон бу санкцияларга кўникиб қолган, аммо агар АҚШ бир кун келиб Эрон ядровий келишувига қайтишни истаса, бу АҚШ ҳукумати учун уларнинг барчасини бекор қилишни қийинлаштиради”, дейди Эроннинг БМТдаги миссияси.

АҚШ Ғазначилик департаментининг Хорижий активларни назорат қилиш бошқармаси маълумотларига кўра, санкцияланган фирмалардан иккитаси Хитойда, қолганлари Вьетнам ва Бирлашган Араб Амирликларида жойлашган. Санкциялар фирмаларнинг АҚШдаги активларини музлатиб қўяди ва одатда америкаликларга улар билан ишлашни тақиқлайди.