AQSHning davlat qarzi tarixdagi eng yuqori ko‘rsatkichga yetdi

AQSHning davlat qarzi 40 trillion dollardan oshib, tarixdagi eng yuqori ko‘rsatkichga yetdi. Bu haqda “Associated Press” xabar berdi.

AQSH milliy qarzi bundan atigi besh oy avval, mart oyida 39 trillion dollarga yetgan edi.

Ma’lum qilinishicha, 40 trillion dollarlik rekord AQSH federal xarajatlarining katta qismini mudofaa, Ijtimoiy ta’minot va Medicare kabi dasturlar, shuningdek, davlat qarzi bo‘yicha foiz to‘lovlari tashkil etayotgan bir paytda qayd etilgan.

Shuningdek, AQSHning qarzi bir necha prezidentlik ma’muriyatlari davrida muntazam ravishda oshib kelgan. Bunga hukumatning soliqlardan tushadigan daromaddan ko‘proq mablag‘ sarflayotgani sabab bo‘lmoqda.

Xususan, COVID-19 pandemiyasi davrida AQSH iqtisodiyotining katta qismi faoliyatini to‘xtatgan. Shu sababli Donald Trampning birinchi prezidentlik davrida va sobiq prezident Jo Bayden ma’muriyati davrida iqtisodiyotni qo‘llab-quvvatlash hamda tiklanishni ta’minlash uchun hukumat katta miqdorda qarz olgan.

Bundan tashqari, Tramp o‘tgan yili respublikachilar tomonidan ishlab chiqilgan soliqlarni qisqartirish va davlat xarajatlari to‘g‘risidagi qonunni imzolaganidan keyin hukumat xarajatlari yana oshirilgan.

Oq uy vakili Kush Desai Tramp ma’muriyati federal xarajatlardagi isrofgarchilik, firibgarlik va suiiste’mollarga chek qo‘yish hamda iqtisodiy o‘sishni tezlashtirish orqali davlat qarzining YAIMga nisbatini yaxshilashga e’tibor qaratayotganini aytgan.

Biroq ekspertlar davlat qarzining keskin oshishi allaqachon amerikaliklarning kundalik hayotiga ta’sir qilayotganini ta’kidlamoqda. Ularning so‘zlariga ko‘ra, ipoteka va avtomobil kreditlari kabi qarz olish xarajatlari oshmoqda. Shuningdek, investitsiya uchun mablag‘i kamaygan kompaniyalarda ish haqining pasayishi, tovar va xizmatlar narxining qimmatlashishi kuzatilmoqda.

Peter G. Peterson Foundation rahbari Maykl A. Petersonning aytishicha, mamlakat turmush darajasini yaxshilash va kelajak avlod uchun barqaror iqtisodiy sharoit yaratish uchun AQSH qonunchilari davlat moliyasini yanada barqaror yo‘lga olib chiqishi kerak.

Bipartisan Policy Center rahbari Margaret Spellings esa federal qarz yashash xarajatlarini oshirayotgani, boshqa xarajatlar va investitsiyalar uchun imkoniyatlarni qisqartirayotgani hamda AQSH iqtisodiyoti va aholining uzoq muddatli farovonligiga xavf tug‘dirayotganini ta’kidlagan.

AQSHda federal hukumat qancha miqdorda qarz olishi mumkinligini belgilovchi qonuniy qarz limiti mavjud. Ushbu limitni Kongress belgilaydi, o‘zgartiradi yoki bekor qilishi mumkin.

Bipartisan Policy Center’ning hisob-kitoblariga ko‘ra, AQSHning milliy qarzi 2027 yil qishining oxiri va yozining o‘rtalarigacha 41,1 trillion dollarlik qarz limitiga yetishi mumkin. Shundan so‘ng, Kongress qarz limitini yana oshirish yoki uning amal qilishini vaqtincha to‘xtatish masalasini ko‘rib chiqishi kerak bo‘ladi.

Iqtisodiy hamkorlik va taraqqiyot tashkilotining so‘nggi ma’lumotlari tahliliga ko‘ra, AQSHning moliyaviy holati rivojlangan davlatlar orasida eng og‘ir ko‘rsatkichlardan biriga ega.

Eslatib o‘tamiz, avvalroq AQSH Prezidenti Donald Trampning reytingi 33 foizgacha tushib ketgani haqida xabar berilgan edi. Bu uning amaldagi prezidentlik davridagi eng past ko‘rsatkichi bo‘lgan.