AQSH senatorlari “Arqadag‘”ga maktub yo‘lladi

Joriy yilning 16 noyabr kuni AQSH senatorlari Dik Durbin, Patrik Lixi va Sherrod Braun hamda Vakillar palatasi a’zosi Tom Malinovski Turkmaniston Prezidenti Gurbanguli Berdimuhamedovga ochiq xat yo‘lladi. Xatda siyosiy mahbuslarni, jumladan,
jurnalist Nurgeldi Xoliqov, shifokor Xursanoy Ismatullayeva va faol Gulgeldi Annaniyozovni ozodlikka chiqarish so‘ralgan. Murojaat matni senator Durbinning rasmiy saytida e’lon qilingan. 

“Sizning rahbarligingizda Turkmaniston o‘z iqtisodiyotiga e’tibor qaratish, shuningdek xalqaro tashkilotlarga, jumladan, JSTga a’zo bo‘lishga intilmoqda. Bu sa’y-harakatlar mamlakatingizdagi inson huquqlari bilan bog‘liq vaziyatga e’tibor bilan quvvatlanadi”, deyiladi bayonotda. 

Senatorlar joriy yilning may oyida Turkmaniston 16 nafar Iegova guvohini qamoqdan ozod qilganini, bu bilan inson huquqlari va e’tiqod erkinligiga hurmat ko‘rsatganini yuqori baholagan. 

“Umid qilamizki, siz xuddi shunday insonparvarlik ishorasini bir qancha boshqa holatlarga nisbatan ham, ehtimol, Betaraflik kuni munosabati bilan ko‘rsatasiz”, deb yozadi senatorlar. 

Ma’lumot o‘rnida, Gulgeldi Annaniyozov 2008 yilda 11 yilga qamalgan. 2019 yil mart oyida u qamoqxonadan yashash sharoiti juda og‘ir bo‘lgan Qorabo‘g‘oz qishlog‘iga 5 yil muddatga ichki surgunga o‘tkazilgan. Senatorlarning fikricha, Annaniyozov allaqachon to‘liq ozodlikka chiqishi kerak bo‘lgan. 

Jurnalist Nurgeldi Xoliqovning Jahon sog‘liqni saqlash tashkiloti delegatsiyasi a’zolarining suratini tarqatganidan so‘ng hibsga olinishi Turkmaniston aholisining so‘z erkinligi huquqidan mahrum bo‘lganini ko‘rsatishi mumkin. 

Xursanoy Ismatullayeva 2017 yilda davolanish uchun ta’tilga chiqqani uchun ishdan bo‘shatilgan edi. Shifokorning ishi Yevroparlamentda tilga olinganining ertasigayoq uning hibsga olinishi dunyoda  Turkmanistonning salbiy imidjini yaratmoqda. 

“Biz sizdan ayolni zudlik bilan ozod qilishingizni so‘raymiz”, degan senatorlar.