AQSH razvedkasining “sotqini” Rossiya pasportini oldi

AQSH Milliy xavfsizlik agentligining sobiq xodimi Edvard Snouden qasamyod qilib, Rossiya pasportini oldi. Bu haqda bugun, 2 dekabr kuni TASS agentligiga uning advokati Anatoliy Kucherenaga tayanib xabar berdi. 

“Ha, u [pasport] oldi. Qasamyod qabul qildi”, deydi u Snouden Rossiya fuqarosi pasportini olganmi, degan savolga javob berib.  

Advokat, shuningdek, Snoudenni bir kun oldin ko‘rganini va uning ahvoli yaxshi ekanini qayd etgan. 

Sentyabr oyi oxirida Rossiya Federatsiyasi Prezidentining farmoni e’lon qilindi, unga ko‘ra AQSH Milliy xavfsizlik agentligining sobiq xodimi Edvard Snoudenga Rossiya fuqaroligi berildi. 

2017 yilda Snouden va amerikalik sportchi va bloger Lindsi Mills Moskvada turmush qurishdi. Kucherenaning aytishicha, Snoudenning rafiqasi hozirda Rossiya fuqaroligini olish uchun ariza topshirmoqda.

2013 yilda Snouden Amerika va Britaniya razvedka agentliklarining elektron kuzatuv usullari, shuningdek, ular o‘z fuqarolarining shaxsiy ma’lumotlarini bir-biriga o‘tkazishi haqidagi ma’lumotlarni oshkor qildi. 

Snouden, shuningdek, ushbu mamlakatlar razvedka xizmatlari xorijiy davlatlar rahbarlarining muzokaralarini noqonuniy tinglash bilan shug‘ullanayotganini ochiqladi. AQSH rasmiylarining ta’qiblaridan qochib, u bir qator davlatlar, jumladan Rossiya hukumatiga boshpana so‘rab murojaat qildi. 2014 yilda u Rossiya Federatsiyasida birinchi yashash uchun ruxsatnomani, keyinroq esa – Rossiya hududida cheksiz qolish huquqini oldi.