AQSH Patriot zaxirasining 5 foizi Ukrainaning qishdan chiqishiga yetadi – Zelenskiy (video)

Ukraina Prezidenti Vladimir Zelenskiy mamlakat qishni o‘tkazishi uchun AQSH Patriot raketalari zaxirasining 5 foizi, Rossiyaning barcha ballistik hujumlarini qaytarish uchun esa ushbu zaxiraning 10 foiziga muhtojligini ma’lum qildi. Bu haqda u CNN telekanaliga bergan intervyusida aytib o‘tdi.

“Agar AQSH bizga Patriot raketalari zaxirasining 5 foizini sotsa, biz qishdan o‘tib, odamlarning hayotini saqlab qolamiz. Agar ular bizga 10 foizini sota olsalar, biz ruslarning barcha ballistik raketalarini yo‘q qilamiz. Menda esa 1 foiz bor”, degan Ukraina rahbari.

Zelenskiyning aytishicha, u har kuni ittifoqchilar bilan qo‘shimcha tutib qoluvchi raketalar ajratilishi bo‘yicha muzokaralar olib boradi va son-sanoqsiz telefon qo‘ng‘iroqlarini amalga oshiradi.

“Bu yil bizda 2025 yilga nisbatan ikki yarim barobar kamroq tutqich raketalar bor. Rossiyada esa oyiga avvalgidan ikki barobar ko‘p ballistik raketalar mavjud. Har kecha hujumlar bo‘ladi, oyiga to‘rt-besh marta esa keng ko‘lamli hujumlarga duch kelamiz. Odamlarimiz juda qahramon va matonatli, ammo ular charchagan”, degan u.

Zelenskiyning aytishicha, u har kuni qo‘shimcha tutib qoluvchi raketalarni olish masalasi bilan shaxsan shug‘ullanadi. Buning uchun esa ayrim tafsilotlarini oshkor qila olmaydigan kelishuvlar ustida ishlashiga to‘g‘ri kelmoqda.

“Men har kuni shunday yashayman: 1 foizdan 5 foizgacha. Men biror narsani raketalarga almashtirishga harakat qilaman. Men hatto baham ko‘rolmaydigan ba’zi ishlarni qilaman. Bu qonundan tashqari degani emas. Lekin men bu haqda gapira olmayman”, degan Ukraina rahbari.

Zelenskiyning so‘zlariga ko‘ra, Prezident Donald Trampning Ukrainaga o‘zining Patriot raketalarini qurishga ruxsat berish haqidagi aniq va’dasi qanday amalga oshishiga hali ham shubha bor.

Tramp NATOning Anqara sammiti doirasida Ukrainaga murakkab tutqichlarni o‘zlari ishlab chiqarish uchun litsenziya olishga ruxsat berishini aytgan edi. Biroq Tramp bir necha kundan keyin bu g‘oyaga ishonchi komil emasligini bildirgan.

Zelenskiy ayrim G‘arb ekspertlarining Putinning NATOga qarshi harakatlarini kuchaytirib, hatto Boltiqbo‘yi davlatlaridan biriga hujum qilishi mumkinligi haqidagi fikriga qo‘shilishini aytgan.

“Putin bu urushni yirik g‘alabasiz qanday yakunlashni bilmaydi. Shu sababli u kichikroq davlatni nishonga olishi mumkin. U uchun bu mamlakat NATO a’zosi ekanligi muhim emas. Asosiysi, tez g‘alabaga erishish va hududni egallash yoki nazorat qilishdir”, degan Zelenskiy.

Eslatib o‘tamiz, avvalroq Ukraina Prezidenti Vladimir Zelenskiy Rossiya bilan tinchlik bitimini AQSH Prezidenti Donald Tramp istagan joyda, jumladan, Oq uy yoki Floridadagi Mar-a-Lago qarorgohida imzolashga tayyorligini ma’lum qilgan edi.