Abdusattorov eng kuchli shaxmatchilar divizioniga yo‘l oldi
Sport
−
08 aprel 2023 7509
Avval xabar berganimizdek, ayni kunlarda o‘zbekistonlik grossmeyster Nodirbek Abdusattorov “Chessable Masters” onlayn turnirida ishtirok etmoqda. O‘z divizionida g‘oliblikni qo‘lga kiritgan Abdusattorov joriy yilning 7 aprel kuni Grand final o‘yinida ishtirok etdi.
Grand finalda o‘zbekistonlik shaxmatchi fransiyalik Maksim Vash-Lagravga qarshi dona surib, raqibini 2,5:1,5 hisoblarida mag‘lub etdi va musobaqaning 1-divizioniga yo‘l oldi.
Ma’lumot uchun, mazkur turnir bahslari uchta divizionda o‘tkazilmoqda. Endi Abdusattorov yuqori divizionda Magnus Karlsen, Fabiano Karauna, Xikaru Nakamura, Uesli So va boshqa kuchli grossmeysterlar bilan bahs olib boradi.
Qayd etish joiz, Nodirbek "Chessable Masters" onlayn turniri bilan bir qatorda Armageddon Championship Series: Asia and Oceania musobaqasida ishtirok etayotgandi, ammo ushbu turnirda Abdusattorovga omad kulib boqmadi. U turnirdagi 2-o‘yinda hindistonlik Gukeshga imkoniyatni boy berib qo‘ydi.
