Abdulla Aripov Moskvada YeOII yig‘ilishida qatnashdi

Bugun, 13 dekabr kuni Yevroosiyo Iqtisodiy Ittifoqi hukumat rahbarlari kengashining navbatdagi majlisi bo‘lib o‘tdi. Amaliy tashrif bilan Moskva shahrida bo‘lib turgan O‘zbekiston Respublikasi Bosh vaziri Abdulla Aripov mazkur yig‘ilishda kuzatuvchi davlat maqomida ishtirok etdi. Bu haqda O‘zbekiston hukumati portalida xabar berildi.

Majlisda Rossiya Federatsiyasi hukumati raisi Mixail Mishustin, Belarus Bosh vaziri Roman Golovchenko, Qozog‘iston Bosh vaziri Oljas Bektenov, Qirg‘iz Respublikasi Vazirlar Mahkamasi raisi Aqilbek Japarov, Armaniston Bosh vaziri Nikol Pashinyan, video murojaat orqali Kuba Bosh vaziri Manuel Kruz qatnashdi.

"O‘zbekiston kuzatuvchi maqomida Yevroosiyo iqtisodiy ittifoqi davlatlari bilan ko‘p tomonlama iqtisodiy hamkorlikni rivojlantirishdan manfaatdorligi bildirildi. Joriy yilning o‘n oyi yakuni bo‘yicha O‘zbekistonning YeOII mamlakatlari bilan tashqi savdo aylanmasi 12 foizga o‘sdi", deyiladi xabarda.

Qayd etilishicha, so‘nggi yillarda mamlakatlarimiz o‘rtasida investitsiya, transport-logistika, turizm sohalarida o‘sish kuzatilgan. Bunda ayniqsa, “Belarus – Rossiya – Qozog‘iston – O‘zbekiston – Afg‘oniston – Pokiston” xalqaro transport yo‘lagi yaratilgani muhim ahamiyatga ega bo‘lgan.

Joriy yil oktyabr oyida Yerevanda bo‘lib o‘tgan Yevroosiyo hukumatlararo kengashi yig‘ilishi yakunlari bo‘yicha imzolangan uch yillik Qo‘shma harakatlar rejasini amalga oshirish boshlangani, shuningdek, kelgusi bahorda O‘zbekiston Savdo-sanoat palatasi va YeOII Ishbilarmonlar kengashining qo‘shma majlisi, shuningdek, O‘zbekiston hukumati va Yevroosiyo iqtisodiy komissiyasining o‘zaro hamkorligi bo‘yicha qo‘shma ishchi guruhining to‘rtinchi yig‘ilishini tashkil etish bo‘yicha faol tayyorgarlik ishlari olib borilayotgani ma’lum qilindi.

Majlisda O‘zbekiston tomoni ishtirokchilarni Prezident Shavkat Mirziyoyevning Oliy Yevroosiyo iqtisodiy kengashining so‘nggi yig‘ilishida ilgari surgan tashabbuslarini faol qo‘llab-quvvatlashga chaqirdi.

Eslatib o‘tamiz, Oliy Yevroosiyo iqtisodiy kengashining yig‘ilishi joriy yil 8 may kuni Moskvada bo‘lgan va unda O‘zbekiston yetakchisi Shavkat Mirziyoyev ham qatnashgandi.