3 nafar o‘zbekistonlik kurashchi Osiyo chempionatida sovrindor bo‘ldi

Qozog‘iston poytaxti Ostona shahrida sport kurashlari bo‘yicha Osiyo chempionati bahslari davom etmoqda. 13 aprel kungi dasturdan o‘rin olgan bahslarda O‘zbekiston terma jamoasi 2 ta kumush va 1 ta bronza medaliga sazovor bo‘ldi. Bu haqda Milliy Olimpiya qo‘mitasi (MOQ) Matbuot xizmati xabar berdi.

-70 kg vazn toifasining finalida gilamga chiqqan Zafarbek Otaxonov qozog‘istonlik Sanjar Dosanovga 0:2, -79 kg toifasining hal qiluvchi bahsida esa Bekzod Abdurahmonov boshqa bir qozog‘istonlik atlet Bolat Sakayevga 4:7 hisobida imkoniyatni boy berdi. Shu tariqa, har ikki o‘zbekistonlik sportchi qit’a birinchiligini kumush medal bilan yakunladi.

Chempionatda O‘zbekiston jamoasi hisobiga yozilgan yana bir bronza medaliga Maxsud Veysalov mualliflik qildi. -97 kg vaznda 3-o‘rin uchun bahs olib borgan Veysalov hindistonlik Dipak Dipakdan 12:9 hisobida ustun keldi.

Bugun, 14 aprel kuni musobaqa bahslari o‘z nihoyasiga yetadi. Turnirning so‘nggi kunida erkin kurash bo‘yicha navbatdagi 5 vazn toifasida g‘olib va sovrindorlar aniqlanadi. Kun dasturida 5 nafar o‘zbekistonlik sportchi bahslarga kirishadi.