2026 yilgi eng yaxshi smartfonlar ma’lum qilindi

2026 yilning birinchi choragi yakunlariga ko‘ra eng yaxshi smartfonlar ro‘yxati e’lon qilindi. Bu haqda “Tom’s Guide” portali xabar berdi.

Mutaxassislar eng kuchli telefon sifatida iPhone 17 Pro Max’ni tanlagan. Ular bu modelda juda kuchli ishlash tezligi, uzoq batareya quvvati, qulay interfeys va yuqori sifatli kamera birlashganini aytishgan. Mutaxassislarning fikricha, bu telefonni sotib olgan odam deyarli mukammal ishlash va sifatli dizayn oladi.

Android telefonlar ichida eng katta raqib sifatida Samsung Galaxy S26 Ultra tan olingan. Bu model katta ekran va uzoqdan yaxshi suratga olish imkonini beradigan kuchli zum kamerasi bilan ajralib turadi.

O‘rta narx segmentida eng yaxshi telefon sifatida Google Pixel 10a ko‘rsatilgan. U ayniqsa sun’iy intellektga asoslangan funksiyalari bilan boshqa raqiblardan ustun turadi.

Eng “aqlli” telefon sifatida Google Pixel 10 Pro tanlangan. Bunga sabab — kuchli kamera va ichki neyron tizim (AI) imkoniyatlari.

Apple ichida eng muvozanatli model sifatida iPhone 17, Androidlar ichida esa OnePlus 15 e’tirof etilgan.

Eng arzon, lekin yaxshi kamera va optik zumga ega telefon sifatida Google Pixel 10 qayd etilgan.

Eng chiroyli dizaynga ega telefon esa Nothing Phone 4a Pro deb topilgan.

Xulosa qilib aytganda, 2026 yil boshida bozorda Apple va Google modellari kuchli ustunlik qilgan, Samsung esa yuqori darajadagi Android segmentida asosiy raqobatchi bo‘lib qolgan.

Eslatib o‘tamiz, avvalroq Apple kompaniyasi 17-avloddagi eng arzon smartfon – iPhone 17e chiqqanini e’lon qilgandi.