Styuardessa bo‘lish uchun nima qilish kerak?

Bugungi kunda styuardessa bo‘lishni orzu qilmagan qizni uchratish qiyin. Styuardessa deganda odamlarning ko‘z oldiga chiroyli tashqi ko‘rinish, nim tabassum, samolyotda bir davlatdan ikkinchisiga parvoz qilish va unchalik ham qiyin bo‘lmagan mehnat keladi. 

Lekin, aslida ham ularning ishi shunchalik osonmi? 

QALAMPIR.UZ ular mehnatining mashaqqatli tomoniga, odamlar ko‘z o‘ngidan yashirin tarafiga e’tibor qaratdi.

Xo‘sh, havo yo‘llari orqali yo‘lovchilarni bir manzildan boshqasiga eltishda asosiy obraz sifatida bizga tanish bo‘lgan bort kuzatuvchilarining faoliyati aslida qanday?

Nima uchun styuardessalikni orzu qilganlarning kamdan kami bu kasbning egasiga aylana oladi?

Talablar nimalardan iborat?

“Bort kuzatuvchisi bo‘lish uchun belgilangan tartib va me’yorlar bor. Ularning eng asosiysi – bo‘y va vazn. Misol uchun, bo‘y 170 sm bo‘lsa, vazn 55 kgdan ortmasligi kerak. Ikkinchi talab esa xorijiy tillarni bilish. Kamida 2 ta chet tilini bilish talab etiladi, shuningdek, geografiya va tarix fanlaridan ham xabardor bo‘lish lozim”, deydi 6 yillik tajribaga ega bort kuzatuvchisi Farangiz Ismonova.

Samolyot yuqoriga ko‘tarilgandan so‘ng undan tushib qolishning imkoni yo‘q. Uchishdan qo‘rqadigan yoki sog‘ligi yomonlashgan yo‘lovchilarni tinchlantirish va ularga birinchi tibbiy yordam ko‘rsatish muhim vazifa. Xo‘sh, bu qanday uddalanadi?

“Bort kuzatuvchilari tibbiyot oliygohlarida o‘qitiladi. Tibbiy yordam ko‘rsatish bo‘yicha sertifikatimiz bor. Bundan tashqari, biz bir vaqtning o‘zida ham tarjimon, ham shifokor, shuningdek, psixolog bo‘lib xizmat qilamiz”, deydi Farangiz Ismonova.

Shu kungacha 10 dan ortiq davlatga parvoz qilgan Farangiz o‘z ishidan zavq oladi, unga qancha xaq to‘lanishi muhim emas. Daromadini so‘raganimzda ham uni sir qoldirishini aytdi.

“Tartib qoidalarimizga ko‘ra oylik daromadimizni 3-shaxsga oshkor qilolmaymiz”, deydi Farangiz Ismonova.

Asosiy vaqtini osmonda o‘tkazadigan Farangiz parvoz payti qiziqarli holatlar ko‘p bo‘lishini aytdi. Bular haqida QALAMPIR.UZ tomonidan tayyorlangan maxsus reportajni tomosha qilib, bilib olishingiz mumkin. 

Ushbu videoreportajni yuqoridagi videopleyerda yoki QALAMPIR.UZ’ning YouTube kanalida tomosha qilishingiz mumkin.

Akobir Misiraliyev