Стюардесса бўлиш учун нима қилиш керак?

Бугунги кунда стюардесса бўлишни орзу қилмаган қизни учратиш қийин. Стюардесса деганда одамларнинг кўз олдига чиройли ташқи кўриниш, ним табассум, самолётда бир давлатдан иккинчисига парвоз қилиш ва унчалик ҳам қийин бўлмаган меҳнат келади. 

Лекин, аслида ҳам уларнинг иши шунчалик осонми? 

QALAMPIR.UZ улар меҳнатининг машаққатли томонига, одамлар кўз ўнгидан яширин тарафига эътибор қаратди.

Хўш, ҳаво йўллари орқали йўловчиларни бир манзилдан бошқасига элтишда асосий образ сифатида бизга таниш бўлган борт кузатувчиларининг фаолияти аслида қандай?

Нима учун стюардессаликни орзу қилганларнинг камдан ками бу касбнинг эгасига айлана олади?

Талаблар нималардан иборат?

“Борт кузатувчиси бўлиш учун белгиланган тартиб ва меъёрлар бор. Уларнинг энг асосийси – бўй ва вазн. Мисол учун, бўй 170 см бўлса, вазн 55 кгдан ортмаслиги керак. Иккинчи талаб эса хорижий тилларни билиш. Камида 2 та чет тилини билиш талаб этилади, шунингдек, география ва тарих фанларидан ҳам хабардор бўлиш лозим”, дейди 6 йиллик тажрибага эга борт кузатувчиси Фарангиз Исмонова.

Самолёт юқорига кўтарилгандан сўнг ундан тушиб қолишнинг имкони йўқ. Учишдан қўрқадиган ёки соғлиги ёмонлашган йўловчиларни тинчлантириш ва уларга биринчи тиббий ёрдам кўрсатиш муҳим вазифа. Хўш, бу қандай уддаланади?

“Борт кузатувчилари тиббиёт олийгоҳларида ўқитилади. Тиббий ёрдам кўрсатиш бўйича сертификатимиз бор. Бундан ташқари, биз бир вақтнинг ўзида ҳам таржимон, ҳам шифокор, шунингдек, психолог бўлиб хизмат қиламиз”, дейди Фарангиз Исмонова.

Шу кунгача 10 дан ортиқ давлатга парвоз қилган Фарангиз ўз ишидан завқ олади, унга қанча хақ тўланиши муҳим эмас. Даромадини сўраганимзда ҳам уни сир қолдиришини айтди.

“Тартиб қоидаларимизга кўра ойлик даромадимизни 3-шахсга ошкор қилолмаймиз”, дейди Фарангиз Исмонова.

Асосий вақтини осмонда ўтказадиган Фарангиз парвоз пайти қизиқарли ҳолатлар кўп бўлишини айтди. Булар ҳақида QALAMPIR.UZ томонидан тайёрланган махсус репортажни томоша қилиб, билиб олишингиз мумкин. 

Ушбу видеорепортажни юқоридаги видеоплеерда ёки QALAMPIR.UZ’нинг YouTube каналида томоша қилишингиз мумкин.

Акобир Мисиралиев