“Havo shari mashmashasi” Kiyevda ham paydo bo‘ldi

Kiyev osmonida burchak reflektori va razvedka uskunalarini olib yurishga mo‘ljallangan oltita havo shari kuzatildi. Havo mudofaa tizimlari yordamida sharlarning aksariyati urib tushirildi. Ular Rossiya tomonidan uchirilgani aytilmoqda. Bu haqda Kiyev ma’muriyati rasmiy Telegram sahifasida ma’lum qildi.

“Dastlabki ma’lumotlarga ko‘ra, Kiyev havo hududida dushmanning oltiga yaqin nishoni aniqlangan. Yangilangan ma’lumotlar bu shamol ta’sirida kosmosda harakatlanadigan sharlar bo‘lganini ko‘rsatdi. Ushbu ob’ektlar burchak reflektorlari va ma’lum razvedka uskunalarini olib yurishi mumkin edi. Barcha havo nishonlarida havo mudofaa tizimlari ishlatildi. Zondlarning aksariyati urib tushirildi. O‘qlarni ishga tushirishdan maqsad bizning zenit mudofaamizni aniqlash va yo‘q qilishdan iborat edi”, deyiladi rasmiy xabarda.

Shuningdek, Kiyev ma’muriyati urib tushirilgan havo sharlari qoldiqlarini batafsil o‘rganib chiqqandan so‘ng, bu ob’ektlarning kelib chiqishi haqida yakuniy xulosalarni e’lon qilishini ma’lum qilgan.

Ta’kidlash joizki, Ukraina Harbiy-havo kuchlari qo‘mondonligi vakili Yuriy Ignat oldinroq ham Ukraina hududida havo hujumidan mudofaa tizimlarini chalg‘itish uchun “burchak reflektorli” sharlar topilgani haqida xabar bergan. Shuningdek, so‘nggi paytlarda dunyoning bir necha mamlakatlarida havo hududiga kirgan noma’lum ob’ektlar urib tushirilgan. Xususan, AQSHda to‘rtta ob’ekt (ulardan biri Xitoy shari edi), Kanada va Moldovada bittadan ob’ekt urib tushirilgan. Xitoy rasmiylari ham mamlakat havo hududida bir nechta shunga o‘xshash ob’ektlar urib tushirilganini da’vo qilgan.

Eslatib o‘tamiz, oldinroq Yaponiya ham o‘z havo hududiga noma’lum havo sharlari kirganini aytgandi.