“Har bir oila – tadbirkor” dasturi doirasida banklarga 500 mlrd so‘m ajratildi

Jamiyat

image

Oilaviy tadbirkorlikni rivojlantirish davlat dasturlari doirasida Tiklanish va taraqqiyot jamg‘armasi tomonidan 1 trln so‘m ajratish ko‘zda tutilgan edi. Bugun, 9 iyun kuni Markaziy bank matbuot xizmati taqdim etgan ma’lumotga ko‘ra, ushbu summadan birinchi bosqichda 500 mlrd. so‘m miqdoridagi resurs Xalq bank, “Agrobank”, “Mikrokreditbank”larning joylardagi filiallariga yetkazilgan.

Joriy yilning 1 iyunidan Oilaviy tadbirkorlikni rivojlantirish davlat dasturlari doirasida kreditlar ajratish bo‘yicha soddalashtirilgan mexanizm joriy etildi.

Unga ko‘ra, mahsulotlarni yetkazib beruvchi (xizmatlar ko‘rsatuvchi) ta’minotchilar ro‘yxatini tasdiqlash amaliyoti bekor qilinishi va faqat naslli chorva mollari (qoramol, qo‘y, echki) yetkazib beruvchilar ro‘yxati ularning yetarlicha imkoniyatlari mavjudligi inobatga olingan holda tasdiqlanadi.

Bundan tashqari, tuman sektori rahbarlari o‘zlariga biriktirilgan hududlarda kredit olish istagini bildirgan shaxslarning tadbirkorlik tashabbuslarini o‘rganib, ularni moliyalashtirish uchun tavsiyanoma beriladi.

Shuningdek, bazaviy hisoblash miqdorining 1000 barobarigacha kredit ajratishga viloyat markazlari tomonidan xulosa berilishi talab etilmagan holda, tuman (shahar) markazlarining xulosalari qabul qilinishi hamda ushbu xulosalar tuman (shahar) hokimlarining birinchi o‘rinbosari va tegishli bank filiali boshqaruvchisi tomonidan belgilangan tartibda ma’qullanishi yetarli etib belgilandi.

Ma’lum qilinishicha, kredit mablag‘lari qarz oluvchilar tomonidan erkin tarzda tuzilgan shartnomalarga asosan mahsulot va uskuna yetkazib beruvchi (xizmat ko‘rsatuvchi)ning hisob raqamiga o‘tkazib beriladi.

Endilikda Oilaviy tadbirkorlikni rivojlantirish davlat dasturlari doirasida kreditlar ajratishda tuman Markazlari tomonidan xulosalar hudud uchun belgilangan resurs mablag‘lari doirasida berilishi, dastur doirasida ajratiladigan mablag‘larning: 

– 70 foizi kafolatlangan yangi ish o‘rinlari yaratishni ko‘zda tutuvchi kichik va o‘rta biznes loyihalariga, 

– 30 foizi ustuvor ravishda uy sharoitida o‘zini o‘zi band qilish, xususan, aholining tomorqasidan unumli foydalanish hamda uy sharoitida hunarmandchilikni rivojlantirishga yo‘naltirish mo‘ljallanmoqda.

“Kreditlar hududlarni ijtimoiy-iqtisodiy rivojlantirishda va kambag‘allikni qisqartirishda hissasi yuqori bo‘lgan (ustuvor ravishda ijtimoiy himoyaga muhtoj va ishsiz fuqarolarni daromadli mehnat hamda yangi ish o‘rinlari bilan band qilishga qaratilgan) loyihalarni moliyalashtirish uchun yo‘naltirilishiga hamda ajratilgan kreditlarning maqsadli ishlatilishi va samaradorligi ta’minlanishiga alohida e’tibor qaratiladi”, deyiladi xabarda.

Eslatib o‘tamiz, ushbu ishlar O‘zbekiston Respublikasi Prezidentining 2020 yil 20 maydagi  “Har bir oila – tadbirkor” dasturini moliyalashtirishga doir qo‘shimcha chora-tadbirlar to‘g‘risida”gi PQ-4720-sonli qaroriga asosan olib borilmoqda.


Maqola muallifi

Teglar

kredit bank

Baholaganlar

195

Reyting

2.9

Maqolaga baho bering

Doʻstlaringiz bilan ulashing