Hafta davomida harorat yana ko‘tariladi – O‘zgidromet

Joriy haftada O‘zbekistonda bulutli ob-havo quyoshli havoga o‘zgaradi va harorat yana ko‘tariladi. Bu haqda Gidrometeorologiya xizmati markazi xabar berdi.

Bugun mamlakat hududining katta qismida yog‘ingarchilik kutilmaydi, faqat Toshkent viloyatida va Farg‘ona vodiysi viloyatlarida ba’zi joylarda qisqa muddatli yomg‘ir yog‘adi, momaqaldiroq bo‘lishi mumkin. Kunduzi termometr ustuni 30-35 darajadan yuqoriga ko‘tarilmaydi, bu o‘rtacha ko‘p yillik qiymatlardan biroz pastdir. Respublika bo‘yicha ba’zi joylarda shamol 15-20 m/s gacha kuchayishi, ayrim joylarda chang-to‘zonlari kuzatilishi mumkin.

Ish haftasi davomida O‘zbekiston bo‘yicha asosan quruq va kam bulutli ob-havo bo‘ladi, faqat ayrim tog‘li hududlarda yomg‘ir yog‘ishi ehtimoli bor, shuningdek do‘l yog‘ishi mumkin. Havo harorati kechalari 16-21 daraja, kunduz kunlari 34-39 daraja atrofida, janubiy va cho‘l hududlarida 40-42 darajagacha bo‘ladi.

13 va 14 iyun kunlari respublikaning tog‘oldi va tog‘li hududlarida sel-suv toshqin hodisalari yuzaga kelishi mumkin.