Зўравонликлар туфайли Тель-Авив дербиси бекор қилинди

Кеча, 19 октябрь куни Тель-Авивдаги “Блумфилд” стадионида ўтказилган “Ҳапоэл Тель-Авив” ва “Маккаби Тель-Авив” ўртасидаги дерби ўйини мухлислар зўравонлиги ҳамда пиротехника воситаларининг кенг қўлланилиши сабаб тўхтатилди. Бу ҳақда “Israel national news” нашри хабар берди.

Исроил полицияси маълумотига кўра, 19 октябрь куни кечқурун стадион трибуналарида ўнлаб тутунли гранаталар ва салютлар отилган. Ўйин расман бошланишидан аввал ҳам мухлислар ўртасида тартибсизликлар кузатилиб, жами 48 та тутунли граната ва 52 та пиротехника воситаси улоқтирилган.

Тартибсизликлар вақтида 9 киши ҳибсга олинган, яна 16 киши вақтинча ушланган. Полиция хабарига кўра, 3 нафар ҳуқуқни муҳофаза қилиш ходими ва 12 нафар тинч фуқаро тан жароҳати олган.

Зич тутун майдонни тўлиқ қоплагач, ҳакамлар футболчиларга кийиниш хоналарига қайтишни буюрди. Орадан кўп ўтмай, хавфсизлик сабабли ўйинни тўхтатиш ва бутунлай бекор қилиш қарори қабул қилинди.

 “Ғалаёнлар, нарсаларни улоқтириш, тутунли гранаталар ва салютлар – булар футбол эмас, бу жиддий оммавий тартибсизлик ва зўравонликдир. Инсон ҳаёти хавф остида қолгани боис, ўйин ўтказилишига рухсат берилмади”, дейилади полиция баёнотида.

Тель-Авив дербисидаги тартибсизликларга икки клуб мухлислари ўртасидаги узоқ йиллик рақобат, сиёсий қарама-қаршилик ва ўйин олдидан пиротехника воситаларининг яширинча олиб кирилиши сабаб бўлганлиги айтилмоқда. Полиция кузатувидаги камчиликлар ҳам вазиятнинг назоратдан чиқишига олиб келган.

Эслатиб ўтамиз, аввалроқ “Маккаби Тель-Авив” жамоаси мухлисларига Европа Лигаси доирасидаги “Астон Вилла”га қарши ўйинга киришга рухсат берилмагани ҳақида хабар қилинган эди.