Зулайҳо Маҳкамова Эрдўғаннинг аёли билан бирга форумда иштирок этди (видео)

Кеча, 22 май куни Туркия Президенти Ражаб Тойиб Эрдўғаннинг рафиқаси Эмина Эрдўған Истанбул шаҳрининг Эсма Султон саройида бўлиб ўтган Халқаро оила форумида иштирок этиб, нутқ сўзлади. Ушбу форумда Ўзбекистон номидан Ўзбекистон Бош вазирининг ўринбосари – Оила ва хотин-қизлар қўмитаси раиси Зулайҳо Маҳкамова иштирок этди. Буни Туркия етакчисининг рафиқаси ижтимоий тармоқларда эълон қилган кадрларда кўриш мумкин.

Эмина Эрдўғаннинг ижтимоий тармоқларда эълон қилган видеолавҳаларида кўриш мумкинки, Ўзбекистон номидан ушбу форумда иштирок этган Маҳкамова Эмина Эрдўғаннинг ёнидан жой олган. Видеолавҳаларда улар форум давомида ўзаро муҳокамага киришганини ҳам кўриш мумкин.

Қолаверса, Эмина Эрдўған форумда чиқиш қилиб, нутқ сўзлаган. У ўз нутқида иштирокчиларга миннатдорлик билдириб, оила институтининг инсон ҳаётидаги асосий пойдевор эканлиги, жамиятнинг энг кичик ва энг кучли бирлиги эканини таъкидлаган.

Эмина Эрдўған оилани – болаларнинг илк мактаби, беморларнинг шифо жойи, қариялар учун осойишта маскан ва барча аъзолар учун энг ишончли паноҳ деб атаган.

“Оилани сақлашнинг энг самарали йўли анъаналаримизга риоя қилиш, бирга дастурхонда ўтириш, сифатли вақт ўтказиш ва қариндошларни зиёрат қилишдир”, деган Эмина Эрдўған.

Шу билан бирга, форумда бугунги кунда оила институти глобал таҳдидлар остида эканлиги, айниқса болалар ва ёшлар технологияга қарамлик ва маънавий қийинчиликлар билан юзма-юз келаётгани қайд этилган.

Тадбир доирасида 15 мамлакат вакиллари бир қатор баёнотларга имзо чеккан. Оила ва ижтимоий хизматлар вазири Маҳинур Ўздемир Эмина Эрдўғанга оила дарахти тасвирланган суратни совға қилган.