Зидан мураббийликка қайтиши мумкин

Кеча, 12 октябрь куни футбол афсонаси Зинедин Зидан “Trento Sports Festival” тадбирида иштирок этди. Тадбирда Зидан  бир кун келиб терма жамоага мураббийлик қилиш ниятида эканини маълум қилди. Бу ҳақда “TalkSport” нашри хабар берди.

 “Мураббийликка қайтишимга ишончим комил. Ҳозирча вақти маълум эмас, бироқ бир кун терма жамоани бошқаришни истайман”,  дейди 53 ёшли Зидан.

Шу билан бирга, у мураббийнинг роли, куч-қуввати ва хоҳиши жамоанинг муваффақиятида катта аҳамиятга эга эканлигини қўшимча қилди:

“Энг муҳими футболга иштиёқ билан ёндашиш. Мураббийнинг кучи ва хоҳиши жамоа муваффақиятининг 80 фоизини ташкил қилади”, деди у.

Зидан 1998 йилги жаҳон чемпионати финалида Бразилияга қарши икки гол уриб, Франциянинг тарихий ғалабасига сабабчи бўлган эди. Мураббий сифатида эса у “Реал Мадрид” билан кетма-кет уч марта Чемпионлар Лигасида ғалаба қозонган. Зинедин Зидан мураббийлик фаолиятида фақат Испаниянинг “Реал Мадрид”  жамоасида ишлаган (2016-2018 ва 2019-2021 йиллар оралиғида). У 2021 йил май ойида “Реал Мадрид”ни тарк этганидан бери мураббийлик фаолиятини давом эттирмаяпти.

Маълумот учун, Франция терма жамоасининг амалдаги бош мураббийи Дидье Дешам 2026 йилги Жаҳон чемпионатидан сўнг лавозимини тарк этишини маълум қилган. Шу боис, Зидан унинг ўрнига асосий номзодлардан бири сифатида тилга олинмоқда.