Журналистнинг ҳибсга олинишига Байден ҳам аралашди

АҚШ Президенти Жо Байден “The Wall Street Journal” муҳбири Эван Гершковичнинг ҳибсга олиниши ноқонуний экани, бунинг АҚШ Давлат департаменти томонидан тан олиниши эса вазиятни ўзгартиришини айтди. Бу ҳақда у бугун, 11 апрель куни Эндрюс базасидан Шимолий Ирландияга учишидан олдин журналистларга маълум қилди.

“Биз содир бўлаётган воқеалар мутлақо ноқонуний эканини аниқ айтмоқдамиз. Биз буни эълон қилдик ва бу вазиятни ўзгартиради”, деган АҚШ раҳбари.

Жо Байденнинг сўзларига кўра, у ҳибсга олинган журналистнинг оиласига телефон қилмоқчи бўлган, бироқ бунга эриша олмаган. Шунинг учун Президент улар билан самолётдан боғланишга ҳаракат қилишга ваъда берган.

Эслатиб ўтамиз, Россия Федерал хавфсизлик хизмати Гершковични Америка томонининг кўрсатмаси асосида Россия ҳарбий-саноат мажмуаси корхоналаридан бирининг фаолияти тўғрисида давлат сирини ташкил этувчи маълумотларни тўплаганликда айблаб, ҳибсга олган эди. Унга қарши Россия Федерацияси Жиноят кодексининг 276-моддаси (Жосуслик) бўйича иш қўзғатилган эди.WSJ ва АҚШ ҳукумати бу айбловларни рад этган, давлат департаменти эса Россиядаги америка фуқароларини мамлакатни тарк этишга чақирди. 2 апрель куни эса АҚШ Давлат котиби Энтони Блинкен Россия Ташқи ишлар вазири Сергей Лавров билан телефон орқали гаплашиб, журналистни озод этишни талаб қилди. Кеча, 10 апрель куни АҚШ Давлат департаменти “The Wall Street Journal” мухбири Эван Гершковични ноҳақ ҳибсга олинган, деб эълон қилди ва мазкур қадам журналистни алмашиш бўйича музокаралар олиб боришга потенциал йўл очиши айтилди.