ЖССТ Ўзбекистонни қизамиқдан холи мамлакатлар рўйхатидан чиқарди

Жаҳон соғлиқни сақлаш ташкилоти (ЖССТ) сўнгги бир неча йил ичида касалланиш ҳолатларининг кўпайгани сабабли Ўзбекистонни қизамиқдан холи мамлакат мақомидан маҳрум қилди. Худди шундай қарор яна беш давлат – Озарбайжон, Австрия, Буюк Британия, Испания ва Арманистонга нисбатан ҳам қабул қилинган. Бу ҳақда ЖССТга таяниб, “Euronews” хабар берди.

Халқаро ташкилот мутахассисларининг аниқлик киритишича, юқорида тилга олинган мамлакатларда 2024 йилда қизамиқ авж олган. Қоидаларга кўра, агар вирус яна пайдо бўлса ва унинг узлуксиз тарқалиши бир йилдан ортиқ давом этса, давлат ушбу мақомни йўқотади.

Мутахассислар касалликнинг кескин кўпайишига асосий сабаб сифатида оммавий эмлашдаги бўшлиқларни кўрсатмоқда. Шу туфайли, айниқса вояга етмаганлар орасида иммунитет пасаймоқда. Қизамиқдан холи мамлакатлар рўйхатидан чиқарилган давлатларда энг кўп касалланиш ҳолатлари 10 ёшгача бўлган болалар орасида қайд этилаётгани таъкидланади.

ЖССТ шунингдек, вирус Европа ва Марказий Осиёнинг кўплаб ҳудудларида кенг тарқалаётганини урғулайди. Хусусан, Руминияда вазият кескин ёмонлашгани қайд этилмоқда. Салбий статистикага эга мамлакатлар қаторига Грузия, Россия, Украина, Туркия, Франция, Германия, Польша ва бошқалар ҳам киритилган. Марказий Осиё республикалари орасида Қозоғистон ва Қирғизистон ҳам тилга олинмоқда.

ЖССТ касалланиш ҳолатларининг аксарияти эмланмаганлар ҳиссасига тўғри келаётганини инобатга олиб, қизамиққа қарши эмлашнинг икки дозаси билан қамровни аҳолининг камида 95 фоизи даражасида таъминлашни қатъий тавсия этмоқда.

Эндиликда Ўзбекистон қизамиқдан холи мамлакатлар рўйхатига қайтиши учун уч йил давомида вируснинг айланиши бутунлай йўқлигини таъминлаши ва эпидемиологик назоратни сезиларли даражада кучайтириши лозим.

Маълумот учун, Ўзбекистон 2017 йилда расман қизамиқни тугатган давлат сифатида тан олинган эди. Ўшанда ЖССТ таҳлилчилари бу қарорни 2014–2016 йиллардаги касалланиш кўрсаткичлари асосида қабул қилинганини билдирган.

Қизамиқ – вирусли табиатга эга бўлган ўткир юқумли касаллик бўлиб, тана ҳароратининг кўтарилиши, йўтал, бурун оқиши, томоқ оғриғи ва тошмалар билан намоён бўлади. Касаллик пневмония, бронхит, энцефалит каби асоратлари билан хавфлидир. Қизамиқдан ҳимояланишнинг ягона самарали усули – эмланишдир.