Жейн Остин ташриф буюрган балл зали остидан қадимий хазина топилди

Assembly Rooms биноси остидаги қазишмалар давомида тахминан 2000 йиллик Рим тангалари, сопол буюмлар ва дубулға парчаси аниқланди. Бу ҳақда “Smithsonian magazine” хабар берди.

Қайд этилишича, Британиянинг Бат шаҳридаги тарихий Assembly Rooms биносини кенг кўламли реставрация қилиш жараёнида “Wessex Archaeology” компанияси археологлари муҳим тарихий кашфиётларни амалга оширган. Ўз вақтида ёзувчи Жейн Остин мунтазам ташриф буюрган XVIII асрга оид балл зали поллари остидан тадқиқотчилар қадимги зовурлар тармоғини ва Рим Британияси даврига оид ўнлаб ашёларни, жумладан, тангалар, сопол буюмлар, шиша идишлар, томга ёпиладиган плиткалар ва ҳарбий дубулға парчасини топган.

Assembly Rooms биноси 1771 йилда Аква Сулис аҳоли пунктининг маркази бўлган машҳур Рим термалари ва маъбуда Сулис Минерва ибодатхонаси яқинида очилган. Остин ушбу балл залини ўзининг “Ақл-идроксизлик” ва “Нортенгер ибодатхонаси” романларида абадийлаштирган, кейинчалик бу ерда Чарльз Диккенс ҳам бўлган. Жорий ишлар бошлангунига қадар мажмуа тупроқнинг чуқур маданий қатламларига киришни тўсиб турган. “National Trust” куратори Татьяна ЛеБоффнинг айтишича, топилмалар бу ерда деярли 2000 йил олдин яшаган ва меҳнат қилган одамлар ҳаётининг тафсилотларини ошкор этади.

Археолог Марек Левкуннинг тушунтиришича, бино остидаги ҳудуд, катта эҳтимол билан, ҳунармандчилик дўконлари ва новвойхоналар жойлашган қадимги шаҳар бўлган. Дубулға парчаси, шунингдек, шаҳар ва йўллар қурилишида ҳарбийларнинг иштирок этганидан далолат беради. Мажмуа Иккинчи жаҳон уруши етказган зарарлардан кейин қайта тиклаш ҳамда Георг даврига оид қандилларни сақлаб қолиш учун 2025 йилдан бери 25 миллион доллардан ортиқ қийматга эга реставрацияга ёпилган. Янгиланган бинонинг ташриф буюрувчилар учун очилиши 2027 йилга режалаштирилган.

Эслатиб ўтамиз, аввалроқ Буюк Британиянинг Норфолк графлиги соҳиллари яқинида ғаввослар XIV асрда денгиз остида қолган Шипден ўрта аср шаҳарчасига тегишли бўлиши мумкин бўлган 25 та иншоот қолдиғини аниқлаган эди.