Рим папаси Россияни Рождествода ўқ отишни тўхтатишга чақирди

Рим папаси Лео XIV католик Рождество байрами муносабати билан бутун дунёда сулҳ ўрнатишга чақирди. Бу ҳақда у 23 декабрь куни кечқурун Рим яқинидаги Кастель-Гандольфодаги резиденциясида журналистларга берган интервьюсида сўз очди.

“Мен яна бир бор эзгу ниятли барча инсонларга мурожаат қиламан: камида Қутқарувчимиз туғилган байрам куни – бир кунлик тинчликни ҳурмат қилинг. Мени жуда қайғуга солаётган ҳолатлардан бири – Россия, кўриниб турибдики, ўқ отишни тўхтатиш талаби рад этганидир”, деди католик черкови раҳбари.

Россия 2022 йил февраль ойида Украинага қуролли бостириб кирганидан бери ўқ отишни тўхтатиш бўйича таклифларни бир неча бор рад этган. Ўтган дам олиш кунлари АҚШнинг Флорида штатида Украинада тинчлик ўрнатиш бўйича қайта бошланган музокараларда ҳам илгарилашга эришилмади. 23 декабрь куни Украина Россия қўшинлари билан қаттиқ жанглардан сўнг Донецк вилоятидаги стратегик аҳамиятга эга Северск шаҳридан чекиниб чиққанини эълон қилди.

“Мен улар қулоқ солишларига ва бутун дунёда 24 соатлик тинчлик бўлишига умид қиламан”, деди Лео XIV дунёдаги можаролар ҳақида гапирар экан.

Понтифик декабрь ойи бошида Италияда Украина Президенти Владимир Зеленскийни қабул қилган эди. Зеленскийнинг Украинани зиёрат қилиш таклифига жавобан Лео XIV кейинроқ шундай деди: “Умид қиламан”. 

Шу билан бирга, у бундай сафар қачон амалга ошиши мумкинлигини ҳозирча айта олмаслигини қўшимча қилди.