“Жеймс Уэбб” телескопи машҳур юлдуз тизимида гигант сайёрани кашф этди

Астрономлар “Жеймс Уэбб” коинот телескопи ёрдамида “Beta Pictoris d” экзосайёрасини аниқлади. Объект Ердан 63 ёруғлик йили узоқлигида жойлашган ёш юлдузнинг ёруғ чанг диски ичида яширинган. Бу ҳақда “ScienceDaily” хабар берди.

Қайд этилишича, Сан-Диегодаги Калифорния университети олимлар гуруҳининг Эйдан Гиббс раҳбарлигидаги тадқиқот натижалари эълон қилинган. Кашфиёт олдиндан маълум бўлган “Beta Pictoris d” сайёраси атмосферасини тадқиқ қилиш чоғида NIRSpec спектрографи ёрдамида амалга оширилган. 

Тўғридан тўғри суратлар ўрнига тадқиқотчилар атмосферанинг кимёвий спектрини, яъни ис гази, сув буғи ва метан сигналларини қайд этган. Бу объектнинг экзосайёра эканини тасдиқлайди ва унинг орқа фондаги юлдуз ёки жигарранг митти юлдуз экани ҳақидаги тахминларни истисно қилишга имкон берган. Қўшимча текширувлар MIRI инструменти ва Жуда катта телескоп (VLT) суратлари ёрдамида ўтказилган.

“Beta Pictoris d” объектининг массаси Юпитер массасидан камида икки баравар кўп. Сайёра юлдуздан тахминан 30 астрономик бирлик узоқликда айланади, бу Нептун орбитасига мос келади. Ушбу кашфиёт чанг дискининг кучли ёруғлик халақити шароитида ўртача аниқликдаги спектроскопия усули билан экзосайёра аниқланган биринчи ҳолат бўлган.

Эслатиб ўтамиз, аввалроқ Ердан тахминан 25 ёруғлик йили узоқликда, Жираф (Камелопардалис) юлдуз туркумида жойлашган GJ 3378b сайёраси ердан ташқаридаги ҳаёт учун энг истиқболли номзодлардан бири бўлиши мумкинлиги ҳақида хабар берилган эди. Янги тадқиқотнинг кўрсатишича, у ўз юлдузининг ҳаёт зонасида (яшаш учун қулай ҳудудда) жойлашган ва унда суюқ сув мавжуд бўлиши учун потенциал шароит бор.