ЖЧ ўйинлари АҚШдаги “хавфли” шаҳарлардан кўчирилиши мумкин

АҚШ Президенти Дональд Трамп 2026 йилги Жаҳон чемпионати ўйинларини хавфсизлик сабабли бошқа шаҳарларга кўчиришни кўриб чиқмоқда. Бу ҳақда у Овал кабинетда журналистларга маълум қилди.

2026 йилнинг ёзида АҚШ, Канада ва Мексика мезбонлик қиладиган 48 жамоали мундиалнинг катта қисми АҚШда ўтказилади. Режага кўра, 104 та ўйиндан 78 таси, шу жумладан, плей-офф баҳслари ҳам АҚШнинг 11 та шаҳрида бўлиб ўтади. Мезбон шаҳарларни танлаш ва турнирни ташкил этиш FIFA ваколатига киради. Шу боис, Трампнинг ўйинларни бошқа шаҳарга кўчириш ваколати бор-йўқлиги номаълум. Бироқ у FIFA президенти Жанни Инфантино билан яқин ҳамкорликда ишлайди ва Жаҳон чемпионати ишчи гуруҳи раиси ҳисобланади.

“Ўйинлар хавфсиз бўлади. Агар хавфсиз эмас деб ҳисобласак, биз уларни бошқа шаҳарга кўчирамиз”, дейди Трамп журналистларга.

Трампдан демократлар бошқарувидаги Сиэтл ва Сан-Францискода бўлиб ўтадиган ўйинлар ҳақида сўралганида у Лос-Анжелесни ҳам тилга олган. Бу шаҳар 2028 йилги Олимпиада ўйинларига ва Жаҳон чемпионатида саккизта учрашувга мезбонлик қилиши режалаштирилган.

“Агар жаҳон чемпионати ёки Олимпиада учун белгиланган шаҳарлардан бири хавфсизлик нуқтаи назаридан муаммоли бўлса, биз бунга йўл қўймаймиз ва ўйинларни бошқа жойга кўчирамиз”, дейди Трамп.

АҚШ етакчиси жиноятчиликка қарши курашни сиёсий кун тартибининг марказига қўйган. У яқинда жиноятчилик даражаси 2023 йилда кескин камайганини кўрсатувчи рақамларга қарамай, Вашингтонга Миллий гвардия ва федерал қўшинларни жойлаштирганди. Президент, шунингдек, Мемфис ва Чикагога ҳам қўшин юборишни режалаштираётганини айтган. Жорий йилнинг июнь ойида эса у Лос-Анжелесга 2000 нафар Миллий гвардиячини ҳужжатсиз муҳожирларга қарши рейдлар чоғида тартибсизликларни жиловлаш учун юборганди.

Маълумот учун, АҚШнинг 11та шаҳри: Атланта, Бостон, Даллас, Хьюстон, Канзас-Сити, Лос-Анжелес, Майами, Нью-Йорк, Филадельфия, Сан-Франциско ва Сиэтлда Жаҳон чемпионати учрашувлари бўлиб ўтади. Турнир 2026 йил 11 июндан 19 июлгача давом этади.

Эслатиб ўтамиз, аввалроқ FIFA 2026 йилда АҚШ, Канада ва Мексикада ўтказиладиган футбол бўйича Жаҳон чемпионати маскотлари намойиш этгани ҳақида хабар берилган эди. Хусусан, Клатч (бургут), Зайю (йўлбарс) ва Мэйпл (буғу) турнирни ҳамкорликда ўтказаётган уч давлатнинг рамзий жиҳатдан ифодалайдиган учлик ҳисобланади. Бургут – АҚШ, йўлбарс – Мексика ва буғу – Канада.