Жазоирлик боксчи Имон Ҳалиф фаолиятини якунлади

Аёллар ўртасида бокс бўйича Олимпиада чемпиони – жазоирлик Имон Ҳалиф боксни тарк этди. Бу ҳақда унинг собиқ менежери Носир Йесфаҳ “Nice-Matin” нашрига берган интервьюсида маълум қилди.

Йесфаҳнинг айтишича, Ҳалиф Париж Олимпиадасига тайёргарлик кўрган Nice Azur Boxe клуби молиявий муаммолар туфайли унга профессионал шартнома бера олмаган, оқибатда у режалаштирилган бешта жанг ўрнига фақат битта жангни ўтказа олган.

“Имон нафақат Ниццани, балки бутун бокс оламини тарк этди”, дейди у.

Йесфаҳнинг сўзларига кўра, бокс бўйича аёллар ўртасидаги Олимпиада чемпиони Ҳалиф ҳозирда асосан Жазоирда, баъзан эса Қатарда машғулот ўтказади, аммо унинг фаолияти ҳозирча ҳомийлик пулларига боғлиқ.

“Ҳозир у ҳаммасини ташлаб қўйди”, дея қўшимча қилган Йесфаҳ.

Маълумотларга кўра, Ҳалиф жорий йилнинг июнь ойида Нидерландиянинг Эйндҳовен шаҳрида бўлиб ўтган халқаро турнирда ҳам қатнаша олмаган. Ташкилотчилар уни гендер тестлари бўйича расмий хулосалар чиқишидан аввалроқ мусобақадан четлатиб юборган.

Маълумот учун, 2023 йилда Ҳалиф ва тайванлик Лин Юй-Тин Халқаро бокс ассоциацияси (IBA) томонидан Жаҳон чемпионатидан четлатилган. Ўша пайтда IBA раҳбари Умар Кремлёв уларнинг генетик таҳлиллари эркаклар хромосомаси тўплами – XY’ни кўрсатганини баён қилган. Шунга қарамай, Халқаро Олимпия қўмитаси уларга Париж Олимпиадасида қатнашишга рухсат берган ва ҳар иккала боксчи олтин медални қўлга киритган. Қайд этиш жоиз, ўзбекистонлик боксчи Ситора Турдибекова Париж Олимпиадасининг чорак финал йўлланмаси учун баҳсида Лин Юй-Тин билан куч синашиб, мағлубиятга учраган эди.

Қайд этиш жоиз, 2028 йилги Олимпиадада бокс мусобақаларини ташкиллаштирадиган World Boxing гендер тестларини мажбурий қилиб қўйди.