Жастин Бибер Ҳиндистондаги аср тўйидан 10 млн доллар ишлаб топди
Олам
−
08 Июль 16364
Америкалик таниқли юлдуз Жастин Бибер ҳиндистонлик миллиардернинг тўйидан 10 млн доллар ишлаб топди. Бу ҳақда “Vanty Fair” нашри хабар берди.
Қайд этилишича, жорий йилнинг 12-14 июль кунлари Анант Амбани ва Радҳика Мерчантнинг тўйи бўлиб ўтиши режалаштирилган.
Бу сафарги тўйолди маросимида афсонавий “Backstreet Boys”, Жастин Бибер, Pitbull, Андреа Бочелли каби хонандалар чиқиш қилди. Хусусан, Жастин Бибернинг саҳнадаги ижролари илиқ кутиб олинди ва тармоқларда муҳокамаларга сабаб бўлди. Билдирилишича, Жастинга бу тўй маросими 10 миллион доллар фойда келтирган. Дабдабали маросим давомида жуфтлик меҳмонларга ўз қўли билан 12-14 июль кунлари бўлиб ўтадиган тўй кунига таклифномаларни тақдим этди.
29 ёшли куёв Анант Амбани сайёрадаги энг бадавлат одамлардан бири, ҳиндистонлик тадбиркор Мукеш Амбанининг ўғли ҳисобланади. Куёвнинг отаси “Reliance Industries” компаниясининг бош директори, унинг бизнеси турли хил энергия, алоқа, тўқимачилик ва кимёвий манфаатларни ўз ичига олган. 2024 йил 3 июль ҳолатига кўра, куёвнинг отаси тахминан 120 миллиард долларлик бойлиги билан Осиёдаги энг бадавлат иккинчи, дунёда эса 11-одам ҳисобланади.
29 ёшли келин Радҳика Мерчант Шаила Мерчант ва Вирен Мерчантнинг қизи бўлиб, унинг отаси “Encope Healthcare” компаниясининг бош директори, унинг онаси эса компаниянинг бошқарувчи директорларидан бири ҳисобланади. “Times of India” нашрига кўра, Радҳиканинг ота-онаси тахминан 90 миллион доллар бойликка эга. Келин Нью-Йорк университетининг сиёсатшунослик факультетини тамомлаган ва ҳозирда отасининг компаниясида директорлар кенгашида фаолият юритмоқда. У, шунингдек, раққосалик билан ҳам шуғулланади.
“Vogue” журналига кўра, жуфтлик 2017 йилда дўстлар даврасида танишган.
“Ўша биринчи учрашув пайтида орамизда ўзига хос бир нарса уйғонганди ва кўп ўтмай биз учрашишни бошлаганмиз”, дейди Радҳика.
Эслатиб ўтамиз, жорий йилнинг бошида Ҳиндистоннинг Жамнагар шаҳрида жуфтлик меҳмонларга тўйолди уч кунлик “ўтириш” қилиб берганди. Бу эса ижтимоий тармоқларда шов-шувга сабаб бўлган. Тадбирда Марк Цукерберг, Иванка Трамп, Билл Гейтс, Муҳаммад бин Абдулраҳмон бин Жассим Ол Соний каби VIP меҳмонлар ҳам қатнашган. Америкалик хонанда Рианна тадбирда чиқиш қилган ва ўз чиқиши учун 8-9 миллион доллар ёки 66-74 миллион рупий миқдорида ҳақ олган. Маълумотларга кўра, бу тўловдан ташқари, Амбани Рианнага миннатдорлик белгиси сифатида олмос билан безатилган соябон совға қилган.
Live
Барчаси
