Жанубий Кореянинг собиқ бош вазири 23 йилга қамалди

Жанубий Кореянинг собиқ бош вазири Хан Док Су 2024 йил декабрь ойида собиқ президент Юн Сок Ёль томонидан ҳарбий ҳолат жорий этишга уринишда айбланиб, 23 йилга озодликдан маҳрум қилинди. Прокуратура 15 йиллик қамоқ жазосини сўраган. Бу ҳақда бугун, 21 январь куни Сеул марказий округ судига таяниб, маҳаллий ОАВ хабар берди.

Суд қарорига кўра, Хан Док Су ўша пайтдаги президент Юн Сок Ёлнинг ҳарбий ҳолат тўғрисидаги фармонини вазирлар маҳкамаси йиғилишида тасдиқлаш орқали унга “процессуал қонунийлик” беришга уринган. Бош вазир ҳам ҳарбий ҳолат тўғрисидаги фармонни сохталаштириш ва кейин уни йўқ қилишда айбдор деб топилган. Яна бир айблов Юннинг импичмент суди пайтида ёлғон кўрсатма бериш бўлиб, унда Хан ҳарбий ҳолат тўғрисидаги фармонни билмаганини даъво қилган.

Бундан ташқари, суд жараёнида собиқ бош вазир собиқ президентга ҳарбий ҳолат жорий этилишига қаршилиги ҳақида гапирганини айтган. Суд Хан конституцияни ҳимоя қилиш мажбуриятларини эътиборсиз қолдирганини ва тўнтаришга уриниш муваффақиятли бўлишига ишониб, унда иштирок этишни танлаганини аниқлаган. Сиёсатчи суд қарорига апелляция бериши мумкин.

Эслатиб ўтамиз, аввалроқ Жанубий Кореянинг собиқ президенти 5 йилга озодликдан маҳрум қилинган эди. 16 январь куни Сеул марказий округ суди собиқ президенти Юн Сок Ёлни 2024 йил декабрь ойида ҳарбий ҳолат жорий этишга уриниши билан боғлиқ бир нечта айбловлар бўйича 5 йилга озодликдан маҳрум қилди. Хусусан, у расмий ҳужжатларни сохталаштиришда ва ҳарбий ҳолат жорий этиш учун қонуний талабларга риоя қилмасликда айбдор деб топилди.