Жанубий Америка футболида яна қонли тўқнашув юз берди (видео)

Жанубий Америка кубоки доирасида бўлиб ўтган Аргентинанинг “Индепендьенте” ва Чилининг “Универсидад” жамоалари ўртасидаги ўйинда мухлислар тортишуви ортидан қонли тўқнашувлар юзага келди. Оқибатда ўйин бутунлай бекор қилинди. Бу ҳақда “The Sun” нашри хабар берди.

Қайд этилишича, жамоалар Буэнос-Айресдаги Либертадорес де Америка стадионида баҳс олиб бораётган, ҳисоб эса 1:1 кўринишида бўлган. Тортишув иккинчи бўлимнинг бошида “Универсидад” мухлисларининг мезбон жамоа мухлисларига турли буюмларни отишни бошлаганидан сўнг авж олиб кетган. Назоратни йўқотган полиция ходимлари ҳатто портловчи моддалар ҳам ишлатишига тўғри келган. Тартибсизликлар оқибатида 3 киши ҳалок бўлгани, 10 нафар томошабин жиддий жароҳат олгани ва 90 нафар чилилик мухлис ҳибсга олингани маълум қилинган.

Нашрга кўра, қонли тортишувдан сўнг учрашув бутунлай бекор қилинган. CONMEBOL ҳамда “Индепендьенте” клуби ҳам буни расман тасдиқлаган. Шунингдек, Жанубий Америка Футбол Конфедерацияси интизомий чоралар кўрилиши мумкинлигини ҳам айтиб ўтган.

Вазиятга Чили Президенти Габриэль Борич ҳам аралашган. У воқеа юзасидан баёнот берган. 

“Авелланеда шаҳрида “Индепендьенте” ва “Универсидад” мухлислари ўртасида содир бўлган воқеалар кўп жиҳатдан мутлақо нотўғри. Мухлислар ўртасидаги зўравонлик ҳам, ташкилотчиларнинг эътиборсизлиги ҳам кечирилмас. Адолат бу ҳолатга жавобгарларни аниқлаши лозим. Бизнинг ҳозирги устувор вазифамиз – ҳужумга учраган фуқароларимизнинг аҳволини билиш, уларни тезкор тиббий ёрдам билан таъминлаш ва ҳибсга олинганларнинг ҳуқуқлари ҳимоя қилиш”, деган Чили раҳбари. 

Президент, шунингдек, фуқаролари ҳолидан хабар олишини ваъда берган:

“Мен Аргентинадаги элчимиз Хосе Антонио Виэра-Галлога топшириқ бердим. “Универсидад” мухлислари ҳибсда сақланаётган полиция бўлимини, жароҳатланганлар ётқизилган шифохоналарни шахсан бориб кўздан кечиради. Биз ўз фуқароларимиз хавфсизлигини таъминлаш устида ишлаяпмиз”.