Жаҳон кубогида 3 нафар америкалик бобслейчи чанадан йиқилиб тушди

Швейцариянинг Санкт-Мориц шаҳрида бўлиб ўтган бобслей бўйича Жаҳон кубоги босқичида ноодатий ҳолат қайд этилди. Тўрт кишилик мусобақа давомида АҚШ терма жамоаси аъзоларидан уч нафари чанадан йиқилиб тушиб, жамоа дисквалификация қилинди. Бу ҳақда “20 Minuten” нашри хабар берди.

Маълум қилинишича, Кристофер Хорн бошчилигидаги экипаж биринчи уринишида бобслей юқори тезликка чиққач, спортчилар ўз жойларини ўз вақтида эгаллай олмаган. Оқибатда улар йўл бўйлаб тарқалиб кетган.

Маълумотларга кўра, спортчилардан бири Хантер Пауэлл бобслейнинг ён томонига йиқилиб, йўл бўйидаги ёғоч конструкцияга урилиб кетган.

Кристофер Хорн оғирлиги 210 килограмм бўлган бобслейни якка ҳолда маррага олиб чиққан, бироқ жамоа қоидабузарлик сабабли дисквалификация қилинган. 

Шунингдек, мусобақа давомида Германия терма жамоаси етакчиси Франческо Фридрих ҳам техник муаммоларга дуч келиб, оқибатда олтинчи ўринни эгаллаган.