Зеленскийнинг қайси ишлари Трампни ғазаблантирмоқда?

Украина Президенти Владимир Зеленский Россия билан тинчлик музокаралари чоғида АҚШ Президенти Дональд Трампни шунчалик ғазаблантирдики, Трамп Украинадан Америка ҳарбий кўмагини олиб ташлаш таклифигача етиб келди. Бу ҳақда исмини ошкор этишни хоҳламаган АҚШнинг уч расмийси “Axios” нашрига берган интервьюсида сўз очди.

Уларнинг сўзларига кўра, Трамп ва Зеленский ўртасидаги можаро даҳанаки жангга айланиб кетган. Бу эса Россия раҳбари Владимир Путинни дадил қилган. Манбаларга кўра, АҚш ва Украина Президентлари орасида 2019 йилда Трампга импичмент эълон қилинганидан бери ноқулай муносабатлар бўлган.

“Чунки Зеленский Ҳантер Байденнинг (Жо Байденнинг ўғли) Украина газ ширкати билан алоқаси устидан тергов ўтказиши эвазига урушдан вайрон бўлган мамлакатга АҚШ ҳарбий ёрдами кўрсатилишига уринди”, деган нашр суҳбатдошлари.

Уларнинг қўшимча қилишича, энди Трамп Россия-Украина урушини тугатиш бўйича келишувни тезда амалга ошириш ҳақидаги ваъдасини бажариш кутилганидан кўра қийинроқ бўлади.

Шунингдек, маъмурият расмийлари “Axios”га сўнгги тўққиз кун ичида Трамп, вице-президент Вэнс, Давлат котиби Марко Рубиони ғазаблантирган бешта воқеа содир бўлганлигини айтган. Уларнинг сўзига кўра, қуйидагилар Трампнинг келишув режасини бузган ёки секинлаштирган:

12 февраль куни Ғазначилик вазири Скотт Бессант Киевда Зеленский билан учрашиб, АҚШнинг амалдаги ҳимояси эвазига Украинанинг фойдали қазилмаларига кириш ҳуқуқини  АҚШга беришни таклиф қилди. Кейинроқ Трамп журналистларга Зеленскийнинг “қўпол” эканлигини ва у ухлагани учун Бессант билан учрашувини кечиктирганини айтди.

14 февраль куни Мюнхен хавфсизлик конференциясида Вэнс ва Рубио Зеленский билан яна шу масала бўйича учрашди.

“Аммо Зеленский уни парламентсиз бир томонлама маъқуллаш ваколатига эга эмаслигини айтиб, америкаликларни ҳайратда қолдирди”, деган расмийлар.

15 февраль куни Зеленский конференцияда таклифни очиқчасига рад этди.

18 февраль куни Марко Рубио ва Президент маслаҳатчиси Стив Уиткофф Саудия Арабистонида россиялик музокарачилар билан тинчлик ҳақида гаплашиш учун ўтирганларида, Зеленский учрашувни Украинасиз столда ўтганини танқид қилди. Ўшанда ғазабланган Трамп Мар-а-Лагодаги матбуот анжуманида Зеленскийнинг ҳаракатларини қоралаб, унда музокара ўтказиш учун 3 йил бўлгани, бироқ бундай қилмаганини айтди.

19 февраль куни Зеленский АҚШ Президенти  “дезинформацион маконда яшайди” деб жавоб қайтарди.  Кейин Трамп Truth Social’да собиқ актёр Зеленский “камтарона муваффақиятли комедиячи” бўлиб, “сайловсиз диктатор”га айлангани ҳақида ёзиб, босимни кучайтирганди. Шундан сўнг, Трамп Путинни танқид қилишдан бош тортди.