Зеленский ва Путин учрашув ҳақида келишиб олди – Трамп

Россия ва Украина Президентлари Владимир Путин ва Владимир Зеленский урушни тугатиш масаласини муҳокама қилиш учун икки томонлама учрашув ташкил қилиш жараёнида. Бу ҳақда кеча, 19 август куни Оқ уй раҳбари Дональд Трамп маълум қилди.

“Президент Путин билан жуда муваффақиятли учрашув ўтказдим. Президент Зеленский билан учрашувим жуда муваффақиятли бўлди ва энди мен нима бўлишини кўриш учун улар менсиз учрашишса яхши бўларди, деб ўйладим”, деди АҚШ Президенти  “The Mark Levin Show” эфирида.

Трампнинг матбуот котиби Кэролайн Ливитт Путиннинг Зеленский билан шахсий учрашувга тайёрлигини тасдиқлади. Унинг сўзларига кўра, Россия Федерацияси ва Украина Президентлари ўртасидаги учрашув режаси ҳозир “ишлаб чиқилмоқда”, “кўп вариантлар” муҳокама қилинмоқда.

“Иккала етакчи ҳам бир-бирлари билан (музокаралар столига) ўтиришга тайёр эканини билдирди ва шунинг учун бизнинг миллий хавфсизлик гуруҳимиз бунда иккала давлатга ёрдам беради”, дейди Ливитт.

18 август куни Вашингтонда Украина Президенти ва европалик сиёсатчилар билан бўлиб ўтган музокаралардан сўнг Дональд Трамп ўзининг Truth Social ижтимоий тармоғида Путин ва Зеленский ўртасидаги учрашувга тайёргарлик ҳақида маълум қилди. Яккама-якка учрашув якунлари бўйича уч томонлама музокаралар бўлиб ўтади.

Ўз навбатида, Россия Ташқи ишлар вазири Сергей Лавров “Россия-24” телеканалига берган интервьюсида Путин ва Зеленский ўртасидаги тўғридан тўғри музокараларга тайёргарлик кўрилганини тасдиқламади. Унинг таъкидлашича, Москва урушни ҳал қилиш бўйича ишлаш учун ҳеч қандай форматни рад этмайди, лекин Лавровнинг сўзларига кўра энг юқори даражадаги алоқалар “иложи борича эҳтиёткорлик билан” тайёрланиши керак.

Франция Президенти Эммануэль Макрон Франциянинг LCI телеканалига берган интервьюсида Женевада тинчлик саммитини ўтказишни таклиф қилди. Шундан сўнг Швейцария Ташқи ишлар вазири Игназио Кассис мамлакат Путин иштирокида Россия-Украина музокараларини ўтказишга очиқлигини айтди. Унга кўра, Берн Россия Президентига Гаагадаги Халқаро жиноий суд қарори билан мамлакатда ҳибсга олинмаслиги учун унга дахлсизлик беришга тайёр.

“Bloomberg” агентлигига кўра, Венгрия Бош вазири Виктор Орбан Вашингтондаги Украина борасида саммит якунлари бўйича Дональд Трамп билан суҳбатида тинчлик музокаралари учун жой сифатида Будапештни таклиф қилган.

Италия Бош вазири Жоржия Мелони Британиянинг “Sky News” телеканали хабарига кўра, Римда учрашув ўтказиш ташаббуси билан чиққан.

“Зеленский ва Трамп Римни, хусусан, Ватиканни афзал кўради, бироқ Путин Женевани афзал кўради”, дейилади телеканал хабарида.