Зеленский Украина ва Беларусь чегарасига халқаро кузатувчиларни жойлаштиришни таклиф қилди

Украина Президенти Владимир Зеленский вазиятни кузатиш учун Украина ва Беларусь чегарасига халқаро кузатувчилар миссиясини жойлаштиришни таклиф қилди. Бу ҳақда у G7 ва Украина етакчиларининг видеоконференциясидаги нутқида айтди. 

Зеленскийнинг таъкидлашича, тинчлик нафақат бир қўшни билан, балки барча қўшнилар билан ҳам тинчлик бўлганида мумкин. 

“Мен бир мамлакатга эътибор қаратмоқчиман. Беларусь ҳудуди аллақачон Украинага ҳужумлар учун ишлатилган. Ва энди биз катта таҳдидни кўрмоқдамиз. Россия биз бу давлатга қарши зарба тайёрлаяпмиз, деб провокация қилиб, Беларусни бевосита бу урушга тортишга ҳаракат қилмоқда. Билвосита, у уларни ичкарига тортди”, дейди у. 

Президент Зеленский Украина Беларусга қарши ҳарбий чоралар кўрмагани ва режалаштирмаганини таъкидлади. Унинг қайд этишича, Украина фақат ҳудудий яхлитлигини тиклашдан манфаатдор. 

“Аммо бу провокацияни, Лукашенкодан эшитиладиган ҳикояларни, ҳатто биздан бўлган ҳар қандай таҳдид ҳақидаги тахминларни ҳам йўқ қилиш учун биз ўз ечимимизни таклиф қиламиз. Украина ва Беларусь чегарасида вазиятни кузатиш учун халқаро кузатувчилар миссияси жойлаштирилиши мумкин. Форматни дипломатларимиз ишлаб чиқиши мумкин. G7 даражасида ушбу ташаббусимизни қўллаб-қувватлашингизни сўрайман”, дейди Зеленский.

Аввалроқ Лукашенко Киевнинг Беларусга қарши фронт очиш иддаоси билан чиқиб, бу ҳаракатни “ҳарбий нуқтаи назардан ақлдан озиш” эканлигини, аммо жараён бошланганини айтди. У ҳозирги вазиятда россиялик ҳамкасби Владимир Путин билан қўшинларнинг қўшма минтақавий гуруҳини жойлаштириш бўйича келишиб олганини қўшимча қилди. Унинг сўзларига кўра, бу гуруҳни шакллантириш ишлари икки кундан бери давом этмоқда.

Шунингдек, Лукашенко Беларусда 1000 дан зиёд россиялик ҳарбийларни жойлаштиришга тайёргарлик кўришга кўрсатма берди.