Зеленский Украина Қуролли кучлари Бош қўмондонини алмаштирди (видео)

Украина Президенти Владимир Зеленский мамлакат Қуролли кучлари Бош қўмондони Александр Сирскийни лавозимидан озод этиб, унинг ўрнига генерал-майор Михайло Драпатийни тайинлади. Бу ҳақда Зеленский ўзининг Telegram-каналида маълум қилди.

“Украина Қуролли кучларининг янги Бош қўмондони лавозимини Михайло Драпатий эгаллашига қарор қилдим”, деб ёзган Зеленский.

Президентнинг айтишича, Сирский Киев мудофааси, Харьковдаги қарши ҳужум ва Курск операциясида муҳим натижаларга эришилишини таъминлаган. У Сирский ҳамда барча украиналик ҳарбийларга фронтдаги хизматлари учун миннатдорлик билдирган.

Зеленскийнинг маълум қилишича, у Сирский ва Украина Қуролли кучлари Бош штаби бошлиғи Андрей Гнатов билан кейинги хизмат фаолияти ҳамда вазифаларни топшириш тартибини муҳокама қилган.

“Барчамизнинг истагимиз битта – душман устидан ғалаба қозониш ва Россияни тинчликка мажбур қиладиган шароитни яратиш”, деган у.

Шунингдек, Зеленский барча қарорлар бугун, 22 июль куни расмийлаштирилишини билдирган.

“22 июль куни барча қарорларни расмийлаштирамиз”, дея ёзган у.

Маълумотларга кўра, Сирскийнинг истеъфоси Украина ҳарбий-сиёсий раҳбариятидаги инқироз фонида юз берган. Бунга аввалроқ Мудофаа вазири Михайло Федоровнинг лавозимидан олиниши сабаб бўлган бўлиши мумкин. Федоров Сирскийни ҳарбий ислоҳотларга тўсқинлик қилишда айблаб, унинг истеъфосини талаб қилган эди. Зеленский эса икки амалдор ўртасидаги муносабатлар жиддий ёмонлашганини тан олганди.

Сирский лавозимидан кетганидан сўнг Федоров унга қўнғироқ қилиб, Киев вилояти мудофааси, Харьков операцияси ва бошқа жанглардаги хизматлари учун миннатдорлик билдирганини маълум қилган.

Эслатиб ўтамиз, аввалроқ Зеленский Бош вазир Юлия Свириденкони бир йил ишлаганидан сўнг лавозимидан озод қилганди. Шунингдек, у давлатнинг энергетика компанияси раҳбарини Бош вазир лавозимига тавсия қилган. Бундан ташқари, Зеленский урушнинг ҳал қилувчи босқичида Мудофаа вазири Михайло Федеровни ҳам ишдан олганди.