Зеленский, Россия, интим дипфейклар. Трамп Конгрессда нималар ҳақида гапирди?

Бугун, 5 март куни АҚШ Президенти Дональд Трамп Конгресснинг иккала палатаси олдида “Америка орзусининг қайта тикланиши” мавзусида нутқ сўзлади. Трампнинг Конгрессга мурожаати телевидение орқали жонли эфирда трансляция қилинди.

Унинг нутқи бир ярим соат давом этди ва бу вақт бўйича АҚШ Президентининг Конгресс олдида қилган энг узоқ чиқишларидан бири сифатида қайд этилди.

Украина ва Россия билан музокаралар

“Мен Украина Президенти Зеленскийдан муҳим мактуб олдим. Унда шундай дейилади: Украина иложи борича тезроқ музокаралар столига ўтиришга тайёр, бу барқарор тинчликка эришиш учун зарур. Президент Трамп раҳнамолигида биз мустаҳкам тинчлик сари ҳаракат қиламиз ва АҚШнинг Украина суверенитети йўлидаги ҳиссасини яхши биламиз”, деди Трамп.

У, шунингдек, Украина билан фойдали қазилмалар бўйича битим тайёрланаётганини маълум қилди ва “Украина уни имзолашга тайёр” эканидан миннатдор эканлигини билдирди.

“Биз Россия билан ҳам жиддий музокаралар олиб боряпмиз. Кўриниб турибдики, Россия ҳам тинчлик музокараларига тайёр. Бу жуда яхши эмасми?” дея таъкидлаган АҚШ етакчиси.

Интим дипфейклар ва янги қонун

Шунингдек, Трамп интернетда интим дипфейк материалларини яратиш ва тарқатиш учун жиноий жавобгарликни назарда тутувчи янги қонун ҳақида ҳам гапирди. У ушбу ҳужжатдан шахсан ўзи ҳам фойдаланишини айтди, чунки интернетда ҳеч кимга унга қарши бўлгани каби шафқатсиз муносабатда бўлинмайди. (Гап Take it Down Act – порнографик материаллардан ҳимояланиш қонуни ҳақида кетмоқда. Бу қонунни АҚШнинг биринчи хоними Мелания Трамп фаол илгари сурмоқда).

Трамп яна нималар ҳақида гапирди?

• У Россия томонидан Украинага нисбатан тинчлик музокараларига тайёрлик борасида “кучли сигналлар” олинганини билдирди.  
• Украинадаги урушни “ақлдан оздирувчи” деб атаб, барча томонларни музокараларга чақирди. 
• АҚШ Гренландияни ўз таркибига қабул қилишга тайёр эканини, агар унинг аҳолиси бунга рози бўлса, бу масала “барибир ҳал бўлишини” айтди. 
• Унинг сўзларига кўра, АҚШ Панама канали устидан назоратни қайта тиклаш жараёнини бошлади ва америкалик компания шартнома имзолади. 
• Шунингдек, Вашингтон импорт товарларига тарифларни оширишини эълон қилди. 
• Трампнинг таъкидлашича, Хитой, Ҳиндистон ва Европа Иттифоқи АҚШнинг жавоб чораларига тайёр бўлиши керак, янги божлар 2 апрелдан кучга киради. 
• Президент Конгрессдан АҚШда тўлиқ ишлаб чиқариладиган янги Golden Dome (Олтин гумбаз) ракета ҳужумига қарши мудофаа тизимини яратиш учун маблағ ажратишни сўради. 
• Шунингдек, у ҳар қандай соҳага ишга қабул қилишда асосий мезон касбий маҳорат бўлиши, ирқ эмаслиги кераклигини таъкидлади. 
• Трамп АҚШ Марсда ва ундан ҳам узоқроқда Америка байроғини ўрнатишини айтди ва АҚШни “дунё ҳали кўрмаган олтин давр” кутаётганини даъво қилди.
• Унинг айтишича, АҚШда полициячиларни ўлдирганлик учун ўлим жазоси жорий этилади.

Украина бўйича баёнотлар ва демократларнинг норозилиги

“Мен Украинадаги шафқатсиз можарони тугатиш учун тинимсиз ишлаяпман”, деди Трамп конгрессменларга мурожаат қилиб.

Унинг сўзларига кўра, миллионлаб украиналиклар ва россияликлар бу мудҳиш ва шафқатсиз урушда беҳуда ҳалок бўлган ёки яраланган, бу урушнинг охири кўринмаяпти. АҚШ Украинага мудофаа ёрдами учун юзлаб миллиард доллар ажратган.

“Бу яна беш йил давом этишини истайсизми?” деди Трамп ва АҚШ Украинани қўллаб-қувватлаш учун Европадан кўра кўпроқ маблағ сарфлаганини таъкидлади.

“Ачинарлиси шундаки, Европа Украинани ҳимоя қилишдан кўра Россия нефть ва газини сотиб олишга кўпроқ пул сарфлади. Буни бир ўйлаб кўринг,” деди АҚШ Президенти.

Трампнинг Украинага оид нутқи чоғида айрим демократлар зални тарк этган. Бироқ намойишлар ёки тухум улоқтириш ҳолатлари кузатилмаган.

Эслатиб ўтамиз, аввалроқ Украина Президенти Владимир Зеленский АҚШдан Украинага ажратилаётган ҳарбий ёрдамнинг тақдири ҳақида расмий маълумот олиш бўйича мамлакатнинг турли идоралар раҳбарларига топшириқ берган эди.