Зеленский қачон Путин билан гаплашишини айтди

Украина Президенти Владимир Зеленский кеча, 14 февраль куни Мюнхен хавфсизлик конференциясида у гаплашишга тайёр Россиянинг ягона вакили Россия Президенти Владимир Путин эканини айтди.

Шу билан бирга, у Украина АҚШ Президенти Дональд Трамп ва Европа етакчилари билан можарони ҳал қилишнинг умумий режасини келишиб олгандан кейингина буни амалга оширишини таъкидлади.

“Мен фақат битта россиялик Путин билан учрашаман ва бу биз Трамп билан, Европа билан умумий режага эга бўлганимиздан кейингина содир бўлади. Биз эса Путин билан музокара столига ўтириб, урушни тўхтатамиз. Фақат шу ҳолатда мен учрашувга тайёрман”, деди Зеленский.

Украина Президентининг таъкидлашича, Украина НАТО аъзоси бўлмаса, ўз қуролли кучларини икки баробарга оширишга мажбур бўлади, бу эса уни бир ярим миллион кишига етказади.

Зеленский конференция иштирокчиларига мурожаат қилар экан, яқинда бўлиб ўтган телефон мулоқоти чоғида Президент Трамп унга шахсий телефон рақамини берганини ва исталган вақтда қўнғироқ қилишига рухсат берганини айтди:

“Хоҳлаган вақтингда қўнғироқ қиласан”, деди. Мен унга айтдим: “Ҳа, катта раҳмат. Лекин охирги марта сиз менга хоҳлаган вақтда тўғридан тўғри қўнғироқ қилишимни айтдингиз ва менга телефон рақамингизни бермадингиз”. У: “Майли, майли, хоҳлаган вақтда қўнғироқ қилишингиз мумкин”, деди”.

Шунингдек, кеча АҚШ вице-президент Жеймс Дэвид Вэнс, Давлат котиби Марко Рубио ва АҚШнинг Украина ва Россия бўйича махсус вакили Кит Келлогг Мюнхенда Владимир Зеленский билан учрашди. Украина Президенти учрашув якунлари бўйича қуйидагича ёзди:

“Гуруҳларимиз ҳужжат устида ишлашда давом этади. Биз кўплаб асосий масалаларни кўриб чиқдик ва генерал Келлоггни кейинги учрашувлар ва жойлардаги вазиятни чуқурроқ баҳолаш учун Украинада қарши олишни интиқлик билан кутамиз. Биз имкон қадар тезроқ ҳақиқий ва кафолатланган тинчлик сари ҳаракат қилишга тайёрмиз. Биз Президент Трампнинг урушни тўхтатиш ҳамда Украинага адолат ва хавфсизлик кафолатларини келтиришда ёрдам беришга бўлган қатъиятини чуқур қадрлаймиз”.

Мюнхен конференцияси доирасида Кит Келлогг ва Украина Президенти девонининг раҳбари Андрей Ермак ўртасида ҳам учрашув бўлиб ўтди. Муҳокама чоғида АҚШнинг Украинага кўрсатаётган ёрдами ва янги икки томонлама учрашувлар режалаштирилган.

“Путин ҳеч қачон қоидалар билан ўйнамайди... Россия билан ҳеч қандай келишув кучли мажбурловсиз ишламайди”, деб ёзди Ермак учрашув якунлари бўйича Х платформасида.