Зеленский АҚШга борди. У Трамп билан музокара ўтказади

Бугун, 28 июль куни Украина Президенти Владимир Зеленский АҚШга учиб борди. Бу ҳақдаги хабар унинг Telegram-каналида эълон қилинди.

Қайд этилишича, ушбу ташриф давомида Зеленский АҚШ Президенти Дональд Трамп билан учрашишни, шунингдек, 11 июль куни вафот этган америкалик сенатор Линдси Грэм хотирасига бағишланган маросимда иштирок этишни режалаштирмоқда.

Зеленскийнинг сўзларига кўра, Трамп ва унинг жамоаси билан ўтказиладиган музокараларда у ракетага қарши мудофаани кучайтириш ҳамда АҚШ билан стратегик шериклик масалаларини муҳокама қилмоқчи.

Трамп эса, ўз навбатида, Зеленский билан Россия-Украина урушини тугатишни муҳокама қилиш иштиёқида. Бундан ташқари, Украина Президенти билан ўтказиладиган музокараларга барча сенаторлар таклиф этилган. Учрашув Конгрессда Россияга қарши санкциялар тўғрисидаги қонун лойиҳаси кўриб чиқилаётган бир пайтда бўлиб ўтади. Трамп ва Зеленскийнинг учрашуви Тошент вақти билан соат 18:30 га режалаштирилган.

Қайд этиш жоиз, Владимир Зеленскийнинг АҚШга ташрифи фонида Украина ва Америка расмийлари ҳавода сулҳ тузиш бўйича таклифни муҳокама қилган. “Reuters” манбаларига кўра, ушбу таклифни урушни тўхтатиш бўйича янги тинчлик ташаббуслари доирасида Россияга тақдим этиш режалаштирилмоқда.

Эслатиб ўтамиз, аввалроқ Киев Россия Президенти Владимир Путинга ўт очишни тўхтатиш бўйича таклифлар билан мурожаат қилган эди, аммо у буни рад этган. Баъзи расмийларнинг фикрича, Украинанинг давом этаётган ҳужумлари сабабли Россия иқтисодиётига тушаётган босим Путиннинг позициясини юмшатиши мумкин.