Зеленский ҳам Трамп ва Путин учрашувида қатнашиши мумкин – ОАВ

Украина Президенти Владимир Зеленский АҚШ ва Россия Президентлари – Дональд Трамп, Владимир Путин ўртасида бўлиб ўтиши керак бўлган музокараларда иштирок этиши мумкин. Бу ҳақда Оқ уйдаги манбага таяниб, CBS News хабар берди.

Нашрга кўра, Украина Президенти Россия ва АҚШ раҳбарлари ўртасидаги музокараларда “муайян даражада” иштирок этиши мумкин. Унинг айнан қайси форматда қатнашиши мумкинлиги аниқлаштирилмаган. Украина ҳукумати бу маълумотни ҳозирча изоҳламаган.

Украина раҳбарининг музокараларда иштирок этиши ҳақидаги хабарлар илк бор янграмяпти. 6 август куни Кремлда ўтказилган музокараларда АҚШ Президентининг Яқин Шарқ бўйича махсус вакили Стив Уиткофф Путин, Трамп ва Украина Президенти Владимир Зеленский ўртасида уч томонлама учрашув ўтказиш ғоясини илгари сурган. Путин эса Зеленский билан учрашув ўтказишга қарши эмаслигини билдирганди, бироқ бунинг учун муайян шарт-шароитлар бўлиши кераклигини таъкидлаган. Путиннинг сўзларига кўра, у Зеленский билан учрашувга “умуман қарши эмас” ва бундай учрашув “кутилиши мумкин”, аммо бунинг учун “муайян шартлар яратилиши керак”. Айни пайтда эса “бу шартларнинг амалга ошишига ҳали анча вақт бор”.

Эслатиб ўтамиз, аввалроқ Оқ уй раҳбари Дональд Трамп ва Россия Президенти Владимир Путин 15 август куни АҚШнинг Аляска штатида учрашиб, Украинадаги уруш келажагини муҳокама қилиши ҳақида хабар берилганди. Трамп учрашув давомида ҳудудлар алмашинуви бўлиши ҳақида сўз очган. Америка раҳбари бу таклиф қандай кўриниши ҳақида батафсил маълумот бермаган. Бироқ CBS News мунозаралардан хабардор манбаларга таяниб хабар беришича, Оқ уй Европа етакчиларини Россия Украина шарқидаги Донбасс минтақасини бутунлай тортиб олиш ва Қримни сақлаб қолишни назарда тутувчи келишувни қабул қилишга ундашга уринмоқда.