“Зарбаларим энди таъсир қиляпти”. Чагаев Валуевни жангга чорлади (видео)

Аввалроқ, россиялик спортчи, оғир вазн тоифасидаги собиқ жаҳон чемпиони Николай Валуев Россия 30 йилдан буён собиқ совет республикаларига нисбатан “юмшоқ сиёсат” қўллагани, энди уларга қаттиқ чоралар кўриш зарурлигини айтиб чиққанди. Унинг таҳдидларига жавобан ўзбекистонлик профессионал собиқ боксчи Руслан Чагаев жавоб қайтарди.

“Менга кўпчилик видео юбормоқда. Унда Николай Валуев Ўрта Осиё ҳақида турли гаплар айтгани акс этган. Фикримча, бу видеолар сунъий интеллект орқали тайёрланган. Агар шундай бўлмаса, унинг бу сўзлари учун ўзбек халқидан узр сўрайман. Ўша вақтдаги зарбаларим энди таъсир қилаётган бўлса керак. Албатта, буни ҳазил тариқасида айтяпман. Чунки, Ўзбекистон билан Россия ўртасидаги алоқалар барқарор ва ижобий ривожланмоқда”, деган спортчи.

Чагаевнинг қўшимча қилишича, агар Валуевнинг калласини жойига қўйиш учун битта жанг керак бўлса, спортчи бунга тайёр.

“Афсуски, Валуевга ўхшаган айрим шахслар турли чиқишлари билан шу муносабатларга соя солишга уринаётгандек. Бундай гап-сўзларга ортиқча аҳамият бермаслик керак. Худо хоҳласа, ҳаммаси яхши бўлади. Валуевнинг калласини жойига қўйиш учун битта жанг керак бўлса, мен тайёрман. Бу сафар, жангдан кейин у бутун Ўрта Осиёни шунақа яхши кўриб қолади ва унақа бемаза гапларни ҳеч қачон гапирмайди”, деган Чагаев.

Эслатиб ўтамиз, аввалроқ “Рус дунёси” мафкурасининг асосчиларидан бири ҳамда кремльпараст пропагандист Александр Дугин Собиқ СССР таркибида бўлган мамлакатлар, жумладан Ўзбекистоннинг ҳам мустақиллигини қабул қилиб бўлмаслиги ҳақида гапирганди.

Қолаверса, 10 январь куни россиялик телебошловчи, Кремлга яқин яна бир пропагандист Владимир Соловьёв ўзининг жонли эфирида Украина ҳудудига уюштирилган “махсус ҳарбий амалиёт”ни “Россия таъсир доирасидаги бошқа ҳудудларда” ҳам, жумладан Марказий Осиё давлатлари ва Арманистонда ўтказиш зарурлигини айтганди.

Соловьёвнинг фикрича, Россия ҳозир қайси ҳудудлар унга тегишли эканини аниқ ва қатъий айтиши лозим. Шунингдек, журналист бу ҳаракатлар йўлида худди Украинага қилинган юриш каби “махсус ҳарбий амалиёт” бошлаш зарурати борлигини айтган.

Орадан бироз вақт ўтиб, Россия Ташқи ишлар вазирлиги матбуот котиби Мария Захарова Соловьёвнинг Россия Марказий Осиё ва Арманистонга “махсус ҳарбий операция” бошлаши кераклиги ҳақидаги гапларига муносабат билдирди.

Захарованинг қайд этишича, россиялик журналистнинг фикрлари расмий Москванинг позициясини кўрсатмайди ва журналист бу гапларни ўзининг каналида айтган, холос. Захарова расмий баёнотни ваколатли шахслар бериши бу диванда ётиб олиб гапирадиган таҳлилчиларнинг иши эмаслигини қўшимча қилган.

Ўзбекистонда “Юксалиш” умуммиллий ҳаракати раиси, Олий Мажлис Қонунчилик палатаси депутати Бобур Бекмуродов Соловьёвнинг мазкур гапларига муносабат билдирдиб, унинг гапларини “сафсата” ўзини эса “нусха” деб атаганди.

“Соловьёвнинг гапларига тупурдик, унинг империялистик амбицияларига ҳам тупурдик. Биз унга сўзма-сўз таржимада шундай маънони берадиган ўзбекча иборани ўрганишни тавсия қиламиз: бориб, ўз булбулинг билан ўйна”, деган Бекмуродов