Замбиянинг собиқ президенти 8 ойдан бери дафн қилинмади

Замбиянинг собиқ президенти Эдгар Лунгунинг жасади ўлганига саккиз ой бўлса ҳам, ҳалигача Жанубий Африкадаги мурдалар сақланадиган жойда турибди. Бу ҳақда “Associated Press” хабар берди.

Гап шундаки, Лунгунинг оиласи билан амалдаги Президент Хакаинде Хичилема ўртасида катта тортишув чиққан. Замбия пойтахти Лусакада давлат дафни учун қабр ҳам қазилган, лекин у ҳалигача бўш турибди.

Лунгу 2025 йилнинг 5 июнида 68 ёшида, қизилўнггач операциясидан кейинги асоратлар сабаб вафот этган. У ўлимидан олдин оиласига Хичилемани жасадига яқинлаштирмасликни айтган. Оила оддий, хусусий дафн маросими ўтказмоқчи. Ҳукумат эса давлат даражасидаги маросим бўлишини талаб қилмоқда.

Иш судгача борган. Август ойида Жанубий Африка суди Замбия ҳукумати жасадни ватанга олиб кетиши мумкин, деган қарор чиқарган. Лунгунинг синглиси Берта судда йиғлаб, Хичилемани жасадни “маросимлар учун ишлатмоқчи” деб айблаган. Президент эса бу гапларни рад этган ва ўзининг христиан динига ишонишини, сеҳр-жодуга ишонмаслигини айтган.

Икки сиёсатчи ўртасидаги зиддият янги эмас. Лунгу 2015 ва 2016 йилги сайловларда Хичилемани ютган. Кейин рақиби давлатга хиёнат айби билан қамалиб, тўрт ой ҳибсда ўтирган. 2021 йилда эса Хичилема сайловда ғалаба қозонган. Шундан кейин Лунгу пенсия пулидан маҳрум қилинган ва унинг оила аъзоларига нисбатан жиноий ишлар очилган.

Хабарда айтилишича, Замбияда бу ҳолат фақат сиёсий эмас, балки руҳий-эътиқодий масала сифатида ҳам қабул қилинмоқда.

Эслатиб ўтамиз, аввалроқ Замбияда президентнинг ҳаётига суиқасд қилмоқчи бўлган икки нафар эркак фолбин икки йиллик қамоқ жазосига ҳукм қилинганди.