Заҳарли ҳаво Ўзбекистонда узоқроқ муддат сақланиб қолиши мумкин

Ўзбекистон атмосферасида юқори босимли майдон келгуси 10 кун давомида сақланиб туриши прогноз қилинмоқда. Бу эса тутун ва майда заррачалар (PM) концентрациясининг ошишига олиб келиши мумкин. Бу ҳақда Ўзгидромет хабар берди.

Қайд этилишича, Ўзбекистон ҳудуди бўйлаб совуқ антициклон таъсири жорий йилнинг 5 декабрига қадар сақланиб туради. Бугун, 29 ноябрдан бошлаб совуқ антициклон таъсири янада кучайиши кутилмоқда, бу эса атмосфера босимининг кўтарилишига ва ҳаво ҳароратининг пасайишига олиб келади, яъни кечалари совуқ, кундузи кучсиз илиқ кузатилади. Совуқ антициклонга хос бўлган эрталабки туман бўлиши мумкин.

Юқори босимли майдон келгуси 10 кун давомида сақланиб туриши прогноз қилинмоқда. Ўзгидромет бунгача инверсия 29 ноябргача давом этиши ҳақида хабар берган. Бироқ синоптик таҳлилларга кўра, совуқ антисиклон давом этиши фонида инверсия ҳодисалари кутилганидан узоқроқ давом этади.

“Узоқ муддатли инверсия чанг, тутун ва майда заррачалар (PM) концентрациясининг ошишига, шунингдек, қуюқ туман ходисалари содир бўлишига олиб келиши мумкин”, дейилади хабарда.

Инфографикалардаги 28 ноябрдан кейинги маълумотлар прогноз хусусиятига эга.

Эслатиб ўтамиз, сўнгги кунларда Тошкент шаҳри ҳавоси таркибида зарарли PM2,5 заррачлари ортиб кетди. Бунинг ортидан пойтахтда бир қатор чоралар кўрилмоқда. Хусусан, Ўзбекистон Республикаси Президенти Шавкат Мирзиёев “Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисида”ги фармонни имзолади ва ушбу ҳужжатга мувофиқ пойтахтда экологик вазиятни яхшилаш юзасидан кечиктириб бўлмайдиган чора-тадбирларни амалга ошириш бўйича махсус комиссия тузилди. Мамлакатдаги бир қанча корхоналар фаолияти тўхтатилди. Хусусан, “ׅMaxam Chirchiq” корхонаси, шунингдек, Навоий вилоятида атмосферага салбий таъсир кўрсатувчи ҳамда экологик экспертиза хулосасига эга бўлмаган 20 та корхона фаолияти вақтинча тўхтатилди. Шу билан бирга, Тошкент вилоятининг Тошкент туманида фаолият юритувчи яна 10 та иссиқхона ёпилди.