“Ювентус”га янги бош мураббий тайинланди

Италиянинг “Ювентус” клуби жамоага янги бош мураббий сифатида Лучано Спаллетти тайинланганини эълон қилди. Тажрибали мутахассис билан мавсум охиригача мўлжалланган қисқа муддатли шартнома имзоланди. Бу ҳақда клуб матбуот хизмати хабар берди.

Турин клуби ушбу мавсумни Игор Тудор бошчилигида бошлаган эди. Бироқ “Ювентус” саккиз ўйиндан иборат ғалабасиз сериядан сўнг мураббий билан ҳамкорликни тўхтатди. Бу натижа жамоани А Серияда саккизинчи поғонага тушириб юборди.

“Биз “Ювентус” оиласига шундай тажрибали мураббийни қабул қилаётганимиздан мамнунмиз. Жамоага хуш келибсиз, мураббий!” дейилади клуб баёнотида.

Маълумот учун, Спаллетти сўнгги бор Италия терма жамоасини бошқарган эди. У жамоа билан Евро-2024 мусобақасининг 1/8 финалида Швейцарияга мағлуб бўлди ҳамда кейинчалик Жаҳон чемпионати саралашида Норвегияга 0:3 ҳисобида ютқазгач, истеъфога чиқишини маълум қилган эди.

66 ёшли мутахассис аввал “Наполи” билан катта муваффақиятга эришган. У 2022-2023 йилги мавсумда жамоани 1990 йилдан бери илк бор Италия чемпиони қилган эди. Шу сабабли, унинг “Ювентус”га келиши Италия футбол жамоатчилиги орасида турлича фикр уйғотмоқда.

Спаллеттининг “Ювентус”даги дебюти эртага, 1 ноябрь куни “Кремонезе”га қарши сафар учрашувида бўлиб ўтади.

Эслатиб ўтамиз, аввалроқ жамоани жорий йилнинг март ойидан бери бошқариб келаётган Игор Тудор истеъфога чиқарилган эди.