Европага йўл олган 1,2 минг мигрант денгизда чўкиб кетган – БМТ

Жорий йил бошидан бери Европага денгиз орқали етиб боришга уринган жами 1 212 ноқонуний мигрант ҳалок бўлган. Бу ҳақда Бирлашган Миллатлар Ташкилоти хабар берди.

Қайд этилишича, энг кўп ўлим ҳолатлари (675 киши) Ўртаер денгизининг марказий қисмини кесиб ўтиш пайтида содир бўлган. Атлантика океанининг Африка ғарбий соҳили бўйлаб 250 киши, Ўртаер денгизининг ғарбий қисмида 155 киши, шарқий қисмида эса 132 киши ҳалок бўлган.

Маълумотларга кўра, ноқонуний мигрантлар кўпинча Испания, Италия ва Греция соҳилларига етиб бориб, у ерда ҳукуматга таслим бўлишга ва бошпана олишга умид қилади ёки қуруқликдан қитъа ичкарисига ўтишга ҳаракат қилади.

Европага денгиз орқали ноқонуний жўнаб кетишнинг энг кўп учрайдиган нуқталари сифатида Туркиянинг ғарбий соҳили, Ливия, Тунис, Жазоир, Марокаш ва Ғарбий Саҳрои Кабир соҳиллари қайд этилган. Жорий йилда денгиз орқали Европага энг кўп ноқонуний кирганлар орасида биринчи ўринда Бангладеш фуқаролари (11 331 киши), иккинчи ўринда мисрликлар (7 599 киши), учинчи ўринда эса афғонлар (6 616 киши) туради. Шунингдек, илк ўнталикка Мали, Эритрея, Судан, Жазоир, Покистон, Сомали ва Сенегал фуқаролари ҳам кирган.

Эслатиб ўтамиз, аввалроқ камида 68 нафар эфиопиялик муҳожир Яман соҳиллари яқинидаги Адан кўрфазида уларни олиб кетаётган қайиқ ағдарилиши оқибатида ҳалок бўлгани хабар қилинганди.