Европага кучли қор бўрони ёпирилди. Қурбонлар бор (видео)

Айни кунларда Европанинг қатор мамлакатларини кучли қор қоплаб олган ва автомобиллар тирбандликларда қолиб кетган. Йўл-транспорт ҳодисалари оқибатида бир неча киши ҳалок бўлган. Бу ҳақда “The Guardian” хабар берди.

Нашрга кўра, кеча, 6 январь куни Франциянинг жануби-ғарбида содир бўлган йўл-транспорт ҳодисалари оқибатида 3 киши ҳалок бўлган, 15 киши жароҳат олган. Париж атрофида эса яна 2 киши автоҳалокатларда вафот этган. Жорий йилнинг 5 январь куни кечқурун бир ҳайдовчи автомобили билан Марна дарёсига тушиб кетганидан сўнг шифохонада вафот этган. Яна 1 киши Франция пойтахтининг шарқий қисмида юк машинаси билан тўқнашув оқибатида ҳалок бўлган. Босния пойтахти Сараевода эса аёл киши дарахт шохи босиб қолиши ортидан ҳаётдан кўз юмган.

“Euronews” маълумотига кўра, Амстердамдаги Схипхол аэропортида бир кун ичида қарийб 600 та рейс бекор қилинган. Бунга учиш-қўниш йўлакларини тозалаш ва учишга тайёр турган самолётларга музга қарши ишлов бериш зарурати сабаб бўлган. Ҳафтанинг қолган кунларида ҳам қор ёғиши давом этиши кутилмоқда.

Кескин совуқ туфайли Буюк Британиянинг шимолий ҳудудларида тун давомида ҳарорат минус 12,5 даражагача тушиб кетган. Қор ёғиши темирйўл, автомобиль ва ҳаво қатновини издан чиқарган, юзлаб мактаблар ёпилган.

Эслатиб ўтамиз, аввалроқ Индонезиянинг Шимолий Сулавеси оролида сув тошқини оқибатида камида 14 киши ҳалок бўлгани, яна бир неча одам бедарак йўқолгани ҳақида хабар берилган эди.