Европа Украина тақдири Украинасиз ҳал қилинишидан хавотирланмоқда

Европа Иттифоқига аъзо давлатлар Украина халқи ўз келажагини ўзи ҳал қилиш эркинлигига эга бўлиши керак, деб ҳисоблайди. Бу ҳақда Аляскада АҚШ Президенти Дональд Трамп ва Россия Президенти Владимир Путиннинг Украина бўйича музокаралари бўлиб ўтиши фонида бугун, 12 август куни эълон қилинган Европа Кенгаши баёнотида сўз боради.

“Биз, Европа Иттифоқи етакчилари, Президент Трампнинг Россиянинг Украинага қарши босқинчилик урушини тугатиш ва Украина учун адолатли ва мустаҳкам тинчлик ва хавфсизликка эришиш йўлидаги саъй-ҳаракатларини олқишлаймиз.
Барқарорлик ва хавфсизликни таъминлайдиган адолатли ва мустаҳкам тинчлик халқаро ҳуқуқни, шу жумладан мустақиллик, суверенитет, ҳудудий яхлитлик ва халқаро чегараларни куч билан ўзгартирмаслик тамойилларини ҳурмат қилиши керак”, дейилади баёнотда.

Қайд этилишича, Украинада тинчлик йўлини Украинасиз ҳал қилиб бўлмайди.

“Биз дипломатик ечим Украина ва Европанинг ҳаётий муҳим хавфсизлик манфаатларини ҳимоя қилиши керак, деган фикрдамиз.
Украина халқи ўз келажагини ўзи ҳал қилиш эркинлигига эга бўлиши керак. Украинада тинчлик йўлини Украинасиз ҳал қилиб бўлмайди. Ўт очишни тўхтатиш ёки ҳарбий ҳаракатларни камайтириш шароитидагина мазмунли музокаралар олиб борилиши мумкин.
Россиянинг Украинага қарши босқинчилик уруши Европа ва халқаро хавфсизлик учун кенгроқ оқибатларга олиб келади”, дейилади баёнотда.

Айни пайтда немис нашрлари бир неча кунлардан сўнг музокаралар бўлиб ўтиши кутилаётган Аляска тасодифан танланмаганини ёзмоқда.  Хусусан, Берлин либерал-прогрессив кундалик газетаси “Der Tagesspiegel” учрашув ўтказиладиган жой ҳақида шундай ёзади:

“Трамп ва Путин учрашуви: ютқазган томон Европа бўлди. Аляска XIX аср ўрталарида Россия томонидан АҚШга сотилган, бу эса ўз навбатида чегаралар ўзгартирилиши мумкинлигини кўрсатади. Алясканинг танланиши атайин ёки тасодифан бўлишидан қатъи назар Украина учун шундай бир сигнал бўлиши мумкинки, тинчлик “ҳудудий ён беришлар” эвазига “сотиб олиниши”га тўғри келади”.

Эслатиб ўтамиз, Россия Президенти Владимир Путин 15 август куни АҚШ Президенти Дональд Трамп билан учрашиб, Украина ва икки томонлама муносабатларни муҳокама қилишни режалаштирмоқда. Путин АҚШ томонидан 1876 йилда Россия империясидан сотиб олинган Аляска штатига ташриф буюрган биринчи Россия етакчиси бўлади.

Дилбар Шоакромова