Европа Россиянинг Украинага янги ҳужум бошлашидан хавотирланяпти

Европа раҳбарлари Украина Президенти Владимир Зеленский билан мамлакатининг хавфсизлик кафолатлари юзасидан ўтказилган учрашувларда Россиянинг Украинага нисбатан янги ҳужум бошлаши эҳтимоли борлигидан ташвиш билдирди. Бу ҳақда бугун, 4 сентябрь куни манбаларига таяниб, “Bloomberg” хабар берди.

Ўтган ҳафта Франциянинг Тулон шаҳрида бўлиб ўтган мажлисда Германия ва Франция расмийлари Донецк вилоятининг шарқидаги Покровск яқинида Россия қўшинларининг тўпланиши ҳақида муҳокама олиб борди. Зеленскийнинг ўзи ҳам ўтган ҳафта айтганидек, Россия фронт чизиғига Покровск ташқарисига тахминан 100 минг солдатни жойлаштирган. Агентликнинг ёзишича, россиялик қўшинлар бир йилдан ортиқ вақтдан бери мазкур шаҳарни ўраб олиш ва эгаллашга уринаётган бўлса-да, ҳалигача муваффақиятга эриша олмаган.

“Покровскнинг қўлга олиниши Россия учун анча катта шаҳарлар — Краматорск ва Славянскка ҳужум қилиш йўлини очади. Москва бутун Донецк вилояти устидан назорат ўрнатишга интилмоқда”, деб ёзади “Bloomberg”.

Материалда айтилишича, Россиянинг ёзги ҳужум операцияси Кремлга ҳалигача катта ҳудудий ютуқ олиб келмади. Май-август ойларида Москва қўшинлари аста-секинлик билан 2033 квадрат километрни эгаллади, бу эса Украина умумий ҳудудининг бор-йўғи 0,3 фоизини ташкил этади.

“Bloomberg” манбаларига кўра, бугун, 4 сентябрь куни Парижда бўлиб ўтадиган “кўнгиллилар коалицияси” йиғилишида Европа даражасида “урушдан кейинги Украина” учун хавфсизлик кафолатлари ҳақида аниқ қарорлар қабул қилиниши кутилмоқда.

Манбаларнинг таъкидлашича, Европа раҳбарлари АҚШ Президенти Дональд Трамп билан ҳам музокаралар олиб бориш ва Украина учун Вашингтоннинг аниқ мажбуриятларини белгилаш, шунингдек, Россияга қарши санкцияларни кучайтиришга ундаш ниятида. Чунки Россия Президенти Владимир Путин яқин вақт ичида Зеленский билан учрашиш истагини билдирмаяпти.

Франция пойтахтида Зеленский билан учрашувда Нидерландия ва Польша Бош вазирлари шахсан иштирок этиши, Буюк Британия ва Италия Бош вазирлари, Германия канцлери ҳамда АҚШнинг махсус вакили Стив Уиткофф эса видеоконференция орқали қўшилиши кутилмоқда.