Европа Иттифоқи Сурияга қарши санкцияларни юмшатди

Европа Иттифоқи Кенгаши Башар Асад режими қулагандан кейин “Европа Иттифоқининг Сурияда инклюзив сиёсий ўтишни қўллаб-қувватлаш ва унинг тез иқтисодий тикланиши, қайта қуриш ва барқарорлаштиришга қаратилган саъй-ҳаракатлари” доирасида Сурияга қарши санкцияларни юмшатишга қарор қилди. Бу ҳақда кеча, 24 февраль куни унинг расмий сайтида эълон қилинган хабарда сўз боради.

Имтиёзлар энергетика ва транспорт соҳалари билан боғлиқ молиявий ва банк операцияларига, шунингдек, “гуманитар мақсадлар ва реконструкция қилиш учун зарур бўлганларга” таъсир қилади. Беш ташкилот ҳам санкциялар рўйхатидан чиқариб ташланади: тўртта банк ва Сурия ҳаво йўллари авиакомпанияси.

Бундан ташқари, Сурияга ҳашаматли товарларни экспорт қилишни тақиқлашдан истисно жорий этилади.

“Бугунги қарорга мувофиқ, Кенгаш ўз фаолиятини давом эттиради ва кейинги иқтисодий санкцияларни тўхтатиб туриш имкониятларини баҳолайди. Шунингдек, у бундай тўхтатиб туришлар ўринли бўлишини таъминлаш учун мамлакатдаги вазиятни диққат билан кузатишда давом этади”, дейилади хабарда.

AFP хабар беришича, Сурия ташқи ишлар вазирлиги раҳбари Европа Иттифоқининг санкцияларни юмшатиш қарорини олқишлаган.

2025 йил январь ойи охирида Европа Иттифоқининг Ташқи ишлар ва хавфсизлик сиёсати бўйича олий вакили Кая Каллас Сурияга қарши санкциялар режимининг келажакда юмшатилишини изоҳлар экан, Дамашқдаги янги ҳокимият “нотўғри қадамлар қўйса”, Европа Иттифоқи томонидан чекловлар янгиланиши мумкинлигини таъкидлаганди. Шу билан бирга, у Дамашқдаги Европа Иттифоқи ваколатхонаси ишининг қайта тикланиши мумкинлигини эълон қилди.

Ўшанда DPA ахборот агентлигининг ёзишича, Европа Иттифоқи санкцияларни юмшатиш орқали Суриянинг янги расмийларига демократияни барпо этиш учун имтиёзлар бермоқчи. Бундан ташқари, Европа Иттифоқи бунинг натижасида суриялик қочқинларнинг бир қисми ўз ватанларига қайтишига умид қилмоқда.