Еврокомиссия Россияга қарши 11-санкция пакетини тайёрлади

Европа комиссияси Россияга қарши 11-санкция пакетини ишлаб чиқишни якунлади ва уни ҳамжамият мамлакатларига тасдиқлаш учун тақдим этди. Бу ҳақда бугун, 8 май куни Брюсселдаги брифингда Еврокомиссия Матбуот хизмати раҳбари Эрик Мамер маълум қилди.

“Мен 11-санкция пакети аъзо мамлакатларга топширилганини тасдиқлашим мумкин. Доимий вакиллар қўмитасида элчиларнинг биринчи муҳокамаси чоршанба (10 май) куни бўлиб ўтади", деган Эрик Мамер.
Бироқ Мамер санкциялар мазмунига изоҳ беришдан бош тортган, шунингдек, 11-пакетнинг кучга кириши мумкин бўлган шартларни ҳам айтмаган.

Айтиш жоизки, бир қатор Европа оммавий ахборот воситалари Европа Иттифоқи Россия билан иқтисодий ҳамкорликнинг тақиқланиши мумкин бўлган тўғридан-тўғри йўналишлари тўпламини амалда тугатганини, шунинг учун 11-пакет санкциялардан зарарни минималлаштиришга қарши курашиш ва уларни четлаб ўтиш чораларига тегишли бўлиши мумкинлиги ҳақида хабар берган.

Эслатиб ўтамиз, олдинроқ Еврокомиссия Украинадаги можаро бошланганидан бери биринчи марта Россияга техник жиҳозлар етказиб бераётган Хитой компанияларига қарши санкциялар жорий этишни таклиф қилганди. Дастлабки рўйхатга 3HC Semiconductors, King-Pai Technology, Sinno Electronics, Sigma Technology, Asia Pacific Links, Tordan Industry va Alpha Trading Investments киради. Етти компаниянинг барчаси яримўтказгичлар, микрочиплар ва электроника ишлаб чиқариш билан шуғулланади.